أكدت المطربة والممثلة لارا إسكندر، أنها تعلمت من كل فريق عمل فيلم "كيرة والجن"، معبرة عن سعادتها بالتمثيل مع أكبر وأهم نجوم في مصر، وأكبر مخرج وكاتب، لافتة إلى أنها كانت محظوظة أنها اشتغلت معاهم لأنهم فعلا ناس محترفة، بخلاف أنهم رائعون في التعامل.
وأضافت لارا إسكندر، خلال مداخلة هاتفية لبرنامج "بحب السيما" الذي يذاع على ميجا إف إم، والبرنامج من تقديم شريف نورالدين: "أنا لغاية دلوقتي لسه مش مصدقة إني شاركت في فيلم "كيرة والجن، لما كلموني عشان أعمل تجربة أداء أمام مروان حامد، قولت ما ينفعش حد يقول "لأ" لحاجة زي دي، وبعتبر نفسي محظوظة جدا إني قدمت الدور ده".
وتابعت: “فيلم كيرة والجن جاني قبل مسلسل الثمانية، والغريبة إني عرفت وقتها إني حامل، والفريق كله اتخض، لكن بعدها بأسبوع ظهرت جائحة كورونا، وتوقف فيها الشغل وربنا ستر وعدت على خير، بعدها بفترة جاني المسلسل”.
وأشارت إلى أنها عندما شاهدت فيلم "كيرة والجن" في العرض الخاص، كانت متأثرة جدا معقبة: “كنت بعيط مع الناس، صحيح أنا عارفة السيناريو، ولكن هنا براعة مروان حامد إنه خلاني بشوف الفيلم زي المشاهد بالظبط”.
وردت على سؤال "هكمل تمثيل أو لأ"؟، قائلة: "أنا مؤمنة بالفن ككل، وحبيت التمثيل جدا، صحيح كان صعب أنفذ المسلسل والفيلم سوا، ولسه مش عارفة اللي جاي فيه إيه، لكن أنا مؤمنة إن كل حاجة في وقتها، ومبسوطة برد الفعل عن دوري في الفيلم والمسلسل".
