تصدرت الفنانة رشا سامي العدل الترند على جوجل، خلال الساعات الماضية، وذلك بعد نجاتها من الموت بأعجوبة بعد تعرضها لأزمة صحية طارئة أدت إلى انسداد الشريان التاجي وهبوط وإحساس بالشلل.
حيث نشرت رشا سامي العدل، عبر حسابها الشخصي بموقع "فيسبوك"، صورة للتقرير الطبي الخاص بحالتها، وكتبت قائلة: "يوم الخميس صحيت بألم فظيع في صدري، ذراعي وإحساس بالشلل فعليًا وشبه قاطعة نفس وفجأة جالي هبوط ووقعت ضغط ٧٠/٤٠، وتم نقلي إلى المستشفى في وضع شديد الخطورة منها بإسعاف مجهز إلى مستشفى تخصص قلب حالتي شبه ميئوس منها، جلطة مكتملة في جدار القلب وانسداد كامل في الشريان التاجي الأيمن، وتم إبلاغ أمي وبنتي أني هاموت في خلال الساعة حرفيًا مش بهزر، وسمعت بودني وابتديت اتشاهد واقرأ كل القرآن اللي حفظاه خائفة ولكن راضية بمشيئة ربنا".
وأضافت: "بمعجزة من ربنا سبحانه وتعالي كتب لي عمر جديد والشريان التاجي فجأة فتح نسبة ١% اللي هي لا تُذكر أصلًا كانت سبب أني أعيش وكل الدكاترة بالإجماع استغربوا من حالتي في سني ده".
وتابعت رشا سامي العدل قائلة: "مؤخرًا أنا اتحطيت تحت ضغوطات كتير صعبة ومؤلمة من وفاة أخويا الصغير لغربتي في دبي لخسارة شغلي لمشاكل عائلية وشخصية لاكتئاب حاد وكتمت جوايا فوق احتمالي، ومن هنا أحب أقول لكم إن الإنسان ضعيف قوي ومفيش حاجة تستاهل وربنا لا يوريكم اللي أنا شوفته أبدًا لا فيكم ولا في حد بتحبوه".
جلطة كاملة في جدار القلب وانسداد كامل في الشريان التاجي الأيمن
وأشارت: "في الأيام المفترجة دي أتمنى الناس اللي بتحبني تدعي لي لأني في قمة اكتئابي وبمر بفترة موجعة جدًا في حياتي من كل النواحي، شكرًا لكل الناس اللي وقفت جمبي واتخضوا عليا على رأسهم أمي وولادي، عمي محمد روح قلبي اللي حضر في التو واللحظة وشوفت خوفه وخضته عليا في عينيه، عمي جمال رغم وجوده خارج مصر كان متابع ثانية بثانية، عمي مدحت ووجع قلبه عليا، عمتي أغلي إنسانة في الدنيا على قلبي وحتة مني عمي رمزي الجميل، والد ابنتي الأصيل إيهاب طبوزادة اللي جيه على ملا وشه من السفر مخصوص، أخويا خالد والدته ماجدة نور الدين وخطيبته هنا، ولاد وبنات ومراتات عمامي كلهم طبعًا".
واختتمت رشا سامي العدل حديثها قائلة: "ماقدرش أتجاهل أبدًا نقيبي دكتور أشرف زكي أخويا وصديقي اللي قلب الدنيا علشان ينقذني في أسرع وقت ممكن، ومنير مكرم اللي كان أول واحد يحضر علشان ينقلني للمستشفى المناسبة لحالتي، الجدعة صحبتي وصاحبة أمي ماجدة حافظ اللي فضلت معايا لحد ما وصلتني البيت وبنتي الغالية على قلبي أم حمزة جنة إبراهيم، زمايلي وأصدقائي الجميلة نهال عنبر، الغالي أيمن عزب، أخويا إيهاب فهمي، أمي التانية راوية سعيد، وطبعًا نص مصر اللي كلموا ماما علشان خافوا يكلموني، صحابي من خارج الوسط بقي دول مش هاقدر اكتب أسامي لأنهم بجد كتير قوووووي ربنا يخليكم ليّ، عيد سعيد عليكم جميعًا".
