كشف النجم عصام شعبان عبدالرحيم عن عدد من كواليس حياته الشخصية خلال لقاء تليفزيوني.
وقال الفنان عصام شعبان عبدالرحيم، خلال لقائه ببرنامج "سابع سما" مع الإعلامية راغدة شلهوب، المُذاع عبر فضائية "النهار"، مساء الثلاثاء: "عمي محمود الليثي، دا فوق، بس أنا زعلان منه، أنا روحت قعدت عند الترب واشتكيت لأبويا لكل من اللي أنا مضايق منه، اتجننت، وقولتله يابا أن هشتكيلك من محمود الليثي، عزمته في فرح بنتي ومجاش ودي أثرت فيا أوي، دا أبويا مكنش بيسيبك في أي حاجة في مشاكل، دا كان قدامك، إزاي أعزمك في فرح بنتي وهي قالتي مش عايزة حد غير محمود، لقيته هو اتصل بيا وقالي والله العظيم عمي شعبان خيره عليا، بس أنا مجتش عشان أنا كنت عامل عملية، قولت له عليا الطلاق لو كنت أعرف إنك عامل عملية لكنت سيبت البنت وجيت لك".
وعلق على صورة والده شعبان عبدالرحيم، قائلًا: "وحشني وشه أوي، لما يسألني عن أختي هقوله يابا، لو حتى هي مزعلاني وجت عليا في أي حاجة هقولها حقك عليا وهروح أبوس إيديها عشان خاطرك، مروحتش عشان أنا مريض وتعبان ومليش خلق لحاجات كتير وحشة، مكنش أبويا عايز كدا إن حد غريب يدخل بيني وبين أختي، بس عشان خاطره هو هروح أعمل أي حاجة".
ورد على سؤال: "مين اللي مضايقك يا عصام؟"، قائلا: "كل الحاجات مضايقاني، الله يرحمك يابا نقرأ له الفاتحة، حسيت نفسي اتعريت لما هو مات، وخايف لسه مش عارف إيه اللي هيحصل بكرة، إيه اللي أنا هعمله هنجح ولا مش هنجح، ولا هعرف أعيش، بس إن شاء الله عشان أنا أبويا راجل جدع مش هقع يعني، بصي أنا السكر عالي عليا ومش مستحمل أزعل عشان كدا خرجيني من المود دا، وأنا بكرر إن أي حد زعلان مني عشان خاطر أبويا والشهر المفترج يسامحني".
