احتفلت الفنانة ياسمين غيث، بمرور 5 سنوات على شفائها من السرطان، كاشفة عن الصعوبات التي مرت بها طوال هذه السنوات.
وقالت، في منشور عبر صفحتها الشخصية بموقع "إنستجرام": "حياة على كف عفريت زي ما بيقولوا لمدة ٥ سني.. اللي اتقال لي إن أول ٥ سنين هما أكتر ٥ سنين حرجة ولازم نتابع علشان السرطان مايرجعش، ولسه مش مصدقة، مش عارفة حصل إزاي.. صعب وعدوا بصعوبة.. قوي.. ولسه لغايه دلوقتي بفتكر، بنهار، بحلم بكوابيس إنه رجع تاني وبصحى أصرخ وأعيط وأقول مش عايزة يحصل لي كده تاني والنبي يا رب".
وأضافت: "بخاف، بعمل فحص كامل كل ٦ شهور، ولن يصبح الأمر أسهل من أي وقت مضى.. كل مرة نفس الإحساس ونفس الخوف.. شكوك وإحباط، وعدم إحساس بالأمان اللي كنت حاسة بيه زمان ووخداه أمر مسلم به، كل مرة الدكتور بتاعي يقول لي ماتخافيش، لو عدا أول خمس سنين من غير ما ييجي تاني يبقي بإذن الله مش هييجي تاني.. وجه اليوم ده، بعد خمس سنين، من يوم ٦/٩/٢٠١٦.. اليوم اللي عرفت فيه إني عندي سرطان، واليوم اللي عملت فيه العملية واتولدت من جديد!!".
ما مرت به خلال فترة مرضها
وتابعت: "عديت بحزن، ألم، وقت صعب، جنان وتشتت، عدم سيطرة علي مشاعري وتصرفاتي، فقدان أمل، كره، حب، فرحة، تغيير، خناق، زعل، ناس بعدت.. قوي، وناس تانية قربت، وناس قربت وبعدين بعدوا، عصبية، غضب، عدم تقبل لنفسي، أرق وعدم راحة، إحساس إني حد ماعرفوش.. إتغيرت! بقيت أوجع وعندي ألم أكتر بس أقوي وواثقة من نفسي أكتر، بقيت بساعد غيري وبدي اللي حواليا أمل!".
واستطردت: "حبيت كل حاجة أكتر من الأول ومسكت في الحياة أكتر وابني روح قلبي كان أملي إني أكمل وأعيش علشان ماكنتش قادرة أقبل فكرة إني ماشوفوش بيكبر!".
وأنهت كلامها قائلة: "ألف حمد وشكر ليك يا رب عدد كل حاجة خلقتها، مهما شكرتك وحمدتك وعملتلك، عمره ما هيبقي كفاية! شكراً إني لسة عايشة وبعافر.. شكرًا علي أكبر نعمة في حياتنا، اللهم ديم علينا جميعا يا رب نعمة الصحة، أصعب ٥ سنين عدوا، فاضل ٢ علشان أخلص بقيت علاجي.. أيوة علاجي لمدة ٧ سنين".
