علقت الإعلامية لميس الحديدي، على أزمة التعصب الكروي وما تعرض له اللاعب محمود عبدالرازق "شيكابالا" نجم الفريق الأول لكرة القدم بنادي الزمالك من تنمر قائلة: "ظاهرة التعصب الكروي لا بد أن نقف أمامها وهو أمر مزعج جداً ونقول ماينفعش.. وأنا بوجه كلامي لبعض جمهور الأهلي لأني عارفة أن جمهور الأهلي جمهور محترم خاصة في وقت فرحته".
وأضافت عبر برنامجها " كلمة أخيرة " المُذاع على شاشة " ON": "عاوزة أكون دقيقة جداً وأنا بقول ده.. لكن من لا يدرك أنه يراد أن يدفع بالأهلي لدائرة العنصرية والتعصب .. مش واخدين بالكم أن دي غلوشة حد بيحاول يخليكم تغلوشوا على فكرة النصر والكأس وتروحوا لمنطقة تانية خالص ويبقى الحديث كله مش على فرحة الأهلي ويبقى اهتمامنا كله شيكابالا عمل إيه، وبعض جمهور الأهلي عمل إيه".
وتابعت: " شيكابالا الحقيقة لاعب متميز جداً وأحرز هدفا مهما، وعيب نشتم الناس بأصلها وشكلها ولونها ..إحنا مانعملش كده كمصريين وكبني أدمين وكأهلاوية .. وبالذات لما تكون منتصر لأن المنتصر دائماً عنده شيمة الكرم وأنا عملت كده مع مرتضى منصور ومارضتش أدخل في الهجوم في أوقات الضعف، وفي قصة شيكابالا حاسة إن فيها افتعال وفيه جر لدائرة الشر .. وأنا دائماً ضد نظرية المؤامرة لكن بدأت أشك إن فيه مؤامرة ؟ وإنتوا عارفين المؤامرة جاية منيين؟".
ووجهت رسالة لشيكابالا قائلة: "أنت كلاعب لازم تكون منضبط بلاش استثارة الجماهير.. إحنا عاوزين نرجع الجماهير للاستاد لو حصل عقوبات.. طبيعي يحصل جدل بين الجماهير بس من غير ماتغلطوا إنتوا كده بتأذوا ناديكم؟".
