كشفت الفنانة الراحلة سناء يونس تفاصيل أول لقاء جمعها بالفنان فؤاد المهندس، وكيف ناداها من وسط عرض كانت تقدمه.
وقالت سناء يونس، في حوار نادر لها: "كان حلم حياتي إني بس أعدي من قدام الشارع اللي بتتعرض فيه مسرحيات الأستاذ فؤاد المهندس أو الأستاذ عبدالمنعم مدبولي ساعتها كانوا أشهر فنانين بيقدموا مسرح وعروضهم كانت دايما بتبقى كاملة العدد".
وأضافت: "في مرة وأنا بعمل بروفة لمسرحية كنت شغالة فيها لقيت حد بينده عليا وأنا في عز البروفة ولما ركزت كويس لقيته أستاذ فؤاد المهندس طبعا زي العيلة الصغيرة من كتر الفرحة لقيت نفسي بقوله أنا يا أستاذ؟؟ بتنده عليا أنا؟".
وتابعت: "من فرحتي سبت البروفة شغالة وروحت له فورًا، لقيت المخرج قال بصوت عالي ستوب إحنا فين هنا؟! قولت له فؤاد المهندس بيندهلي كنت لسه بنت ريفية علي سجيتي جدًا، وساعتها أستاذ فؤاد أتدخل عشان المخرج ما يزعلش مني.. المهم لقيته بيسألني إنتي بتعملي إيه؟ قولت له بمثل تراجيدي.. قالي بلا تراجيدي بلا نكد، إنتي مكانك مش هنا، بكره تيجي لي المسرح ولقيته راح يستأذن من المخرج عشان ياخدني.. وفعلا عملت أول رواية مع الأستاذ فؤاد المهندس، رواية كان اسمها "حالة حب".
أحمد زكي وحلم العمل مع فؤاد المهندس
وأكملت: “بقيت بعدها أشهر من المحافظ اللي في محافظتي الزقازيق، وكان فيه كام واحد من مجانين الفن والتمثيل بيستنوني كل مرة وأنا راجعة الزقازيق عشان يستقبلوني مخصوص ولا كأني الست فاتن حمامة في زمنها! وكان من ضمن الناس دي شاب أسمر بيحب تمثيلي جدًا وفخور بيا إني رفعت اسم الزقازيق، بالعمل مع الأستاذ فؤاد المهندس، الشاب ده هو نجمنا العظيم أحمد زكي”.
