قدم الفنان محمود الفيشاوي، أول دور في حياته وهو في عمر الـ60، في فيلم "1000 مبروك"، مع الفنان أحمد حلمي، وكان أول وآخر دور في حياته.
وشارك محمود الفيشاوي، في الفيلم لأن السيناريست محمد دياب، هو من رشحه له لأنه صديق نجله، وقال "الفيشاوي"، عن تجربته، إنه عندما ذهب لمقابلة الفنان أحمد حلمي في مكتبه قال له "أنا أول مرة أمثل بس عارف أنا عندي كام سنة أنا عندي 60 سنة.. بس من وأنا عندي 10 سنين وأنا نفسي أمثل وأبويا الله يرحمه كان رافض وبشدة وخوفًا على زعله مرضتش أحاول إني أمثل بس كان على طول يراودني حلم التمثيل واشتغلت في مصلحة حكومية وأنا دلوقتي وكيل وزارة في الكهرباء بس طول أيام عمري مانستش حلمي في التمثيل وأخيرًا ربنا حققلي حلمي".
وقال أحمد حلمي: "إن شاء الله الدور يكون من نصيبك ولو كده أنت هتعمل دور والدي في الفيلم، فرد عليه وقال له: "لو الدور طلع من نصيبي أنا مش همثل، أنا هاعملك على إنك ابني، هقولك يا أحمد مش يا أستاذ".
تعليق أحمد حلمي على تمثيله
وقال أحمد حلمي عنه في كتابه "28 حرف": "فعلًا ماكنش بيمثل كان بيتعامل إنه أبو أحمد حلمي بجد حتى في الكواليس وقد إيه هو أضاف للدور".
و كان آخر كلام محمود الفيشاوي مع أحمد حلمي: "أنت عارف يا أحمد أنا لو عملت الفيلم ده وبعد كده موت مش هيفرق معايا وهموت وأنا فرحان لأني حققت حلمي حتي لو حلمي ده قعد معايا 60 سنة بس أنا في الآخر وصلتله".
وجرى عرض الفيلم في آخر سنة 2009 وتوفي محمود الفيشاوي، في 18 يناير2010 بذبحة صدرية.
