علقت الإعلامية مفيدة شيحة، على الجدل الدائر حول أجر الرضاعة للأم، قائلة: "بلاش ندمر ما تبقى من الأسرة المصرية، بقالنا كام يوم، الدنيا قايمة مش قاعدة بسبب تصريحات لعدد من الشخصيات عن شوية حاجات كدا المرأة مش ملزمة بيها، زي إنها مش ملزمة تخدم جوزها، مش ملزمة تطبخ له، مش ملزمة تقوم بالأعمال المنزلية بشكل عام يعني، وكانت أكتر حاجة مثيرة للجدل إنها مش ملزمة ترضع ولادها، وإذا عملت كدا تاخد أجر".
وأضافت شيحة، خلال تقديم برنامج "الستات" على شاشة "النهار"، أن هذه التصريحات أحدثت انقسامًا كبيرا جدا في المجتمع، مردفة: "شوفنا ستات مبسوطة بالتصريحات وشايفة إن المرأة مش ملزمة وإنها بتعمل ده كنوع من التفضل على الرجل، وفي المقابل فيه ستات تانية شايفة إن الست بتعمل الحاجات دي بالفطرة، مش علشان مجبرة عليها".
وأردفت مفيدة شيحة: "أما الرجالة شافت إن الست لو شايفة إن كل اللي بتعمله في بيتها نوع من التفضل على الرجل، أو إنه مطالب يدفع أجر على كل حاجة بتعملها الست في البيت، يبقى إيه لازمة الجواز نفسه، وهنا بقى هو الخطر".
مفيدة شيحة: هل الحديث عن حقوق المرأة نصيحة أم فخ؟
وتابعت: "ولما بيتقال للست على حاجات معينة ده حقك ولازم تاخديه، بتكون فعلا نصيحة علشان مصلحتها وتاخد حقوقها المهدرة ولا فخ ممكن بسببه يحصل خراب في بيوت مستقرة؟".
واستطردت: "الحقيقة يمكن الموضوع أخد أكبر من حجمه بكتير وخرج عن سياقه، وبقى كل من هب ودب بيتكلم فيه ويفتي، ومش كل ترند يظهر يصح أن كل الناس تتفاعل معاه بكل الفوضوية دي! دا غير إن مش معقول كل الناس متخصصة في كل حاجة، هذه العشوائية اللي بيدار بيها النقاش وعلى المشاع متوصلناش كلنا لأي تفكير منظم وسليم خصوصًا في القضايا الأساسية في الحياة".
