يحرص دائمًا الفنان تامر حسني، على التواصل مع جمهوره عبر حساباتها الشخصية بمواقع التواصل الاجتماعي المختلفة من حين لآخر، ويقدم لهم الدعم والرسائل المختلفة.
وفي فيديو جديد له، عبر حسابه على موقع تبادل الصوروالفيديوهات القصيرة “إنستجرام”، كشف تامر حسني عن سعادته باستعانة طلبة الجامعات بأعماله ضمن مشاريع تخرجهم.
وقال “حسني”: "فرحة عمري لما شباب عظيم من شباب مصر الواعد يستوحي مشروع تخرجه أو يقتدي بأغنية ليا زي الموضوع فيك أو مش تمثال أو قد التحدي والله والله وانا بعمل الأغاني دي كانت دي نيتي إنها تتحس ويتعمل بيها مش تتسمع بس والحمدلله اللي طلبته من ربنا حصل عشان اللي بيطلع من القلب بيوصل للقلب".
وأضاف: "مبروك شباب مصر العظيم، يارب حياة جديدة كلها خير ونجاح وطموح لا ينقطع، ربنا يفرح أهاليكم بيكم انتوا أملنا وانتوا النماذج المشرفة الحقيقية، الحقيقه اتطلب مني كلمة اقولها للشباب اللي بيتخرجوا بس انا كدا كدا كنت هكتب لكل شبابنا مش اللي بيتخرج بس بكتب لينا كلنا اكتروا وخلوا ايديكم في ايد بعض".
وواصل: "هفضل اقولها مفيش حل غير انك تنجح لما بتنجح كل الناس بتقدرك واللي مكانش فاهمك ومصدقك بيصدقك وبيحترمك، لما بتنجح بتبقى قوي ومرغوب فيك، لما بتنجح ربنا بيحبك وبيستخدمك عشان تنفع غيرك".
وأكمل: "يا شباب يا جميل متبخلوش على بعض بالنصيحة والكلمة الطيبة وفعل الخير أي فكر شرير مهما كان كتير لازم يلاقي قصاده فكر خير أكبر وأكتر عشان ننهض ببلدنا ونسلمها لأولادنا أحسن مما كانت في زمنا هي دي رسالتنا كبشر وكل حد فينا ما دام بيصحى من النوم بيلاقي نفسه لسه عايش لازم يعرف إنه لسه مطلوب منه مهام في الدنيا لازم يعملها ويفرح إن ربنا مديله وقت وعمر يحقق فيه ومهما كانت الصعاب انت لازم تبقى بطل قصة حياتك، عمركم سمعتوا عن بطل معندوش معاناة !!؟ مستحيل".
واختتم: "المعاناة دي اللي هتصنع منك راجل قد المسؤولية وهتبقى بسببها بطل في قصة حياتك ومش عيب تبدأ من الصفر ياما ناس بدأت من تحت الصفر ووصلوا لأكتر من إحلامهم إنتوا كمان هتوصلوا، ثقوا في نفسكوا وخلوا يقينكم بالله أقوى شيء، صراع الدنيا صراع يقيني، صدق نفسك انت تقدر وانتي تقدري، يعلم ربنا أنا بحبكوا قد إيه ونفسي أشوف شباب الوطن كله ناجح وفرحان ومفرح أهله مبروك يا أمل مصر".
