كشفت المخرجة ريما الرحباني ابنة الفنانة اللبنانية الكبيرة فيروز، للمرة الأولى عن صور لشقيقها الأكبر "هلي"، الذي يظهر للإعلام للمرة الأولى وكشفت من خلال تعلقيها أنه من ذوي الهمم.
وكشفت الصور عن ظهور جديد للفنانة فيروز، برفقة نجلها زياد الرحباني، ونجلها هلي، وهو الأبن الأكبر لها، والذي يعاني من الشلل وأصم وأبكم، ونشرت ريما صورًا لزيارتهم لكنيسة عبر صفحتها الشخصية بموقع "فيس بوك"، وكشفت في تعليقها عن وصية والدها عاصي الرحباني عن شقيقها.
وعلقت على الصورة قائلة: "فيروز (إمّي)، زياد (أخوي)، وهلي الرحباني (أخوي)، الثلاثاء ٢١ مايو ٢٠٢٢ في تمام الساعة ٨ و٢١ دقيقة، كنيسة السيّدة - المحيدثة - بكفيا كنيسة العاصي، القداس السنوي عن راحة نفس عاصي (أبوي)، وليال الرحباني (إختي)، مع الصديق الأبونا ملحم".
وتابعت: مش من زمان كتير فهمت إشيا كتيرة..أسئلة كتير كنت إطرحها بيني وبين حالي، إطرحها على خوارنة ومطارين..ع فلاسفة ومؤمنين.. فتش عنها بالكتب والأناجيل.. وولا مرّة حدا بجوابو ريّحني أو قنعني! ليه هلي خلق بهالعيلة؟ وليه صار معو هيك؟ ليه عاصي فل بكير؟ وليال فلّت أبكر من بكير!... وليه؟ وليه؟ ولَيْهات كتيرة ضل إسألها.. ونفسي ما ترتاح من الوَجع ومن الأسئلة! إسمع كلام كتير ما يعنيلي شي ما يحرّك فيّي شي!".
وأضافت: "ضريبة الشهرة".. "مقابل كل فرح في وجع!".. "مقابل كل نجاح في بِكي"..وما كانت تِرضى نفسي ولا تِستَكين.. وربنا شو؟ بيَعطي وبياخد؟ ربنا ليه راضي بهالظلم كلّو على هالارض الواسعة؟ ليه ما وزّع كَرمو على كل الناس بالعَدل والتَساوي؟ ليه؟ ليه؟ اأ ما بنكر إنّي مرّات "كتير بكيت وصلّيت أنا وحالي ووحدي إحتجّيت!" وزعلت منّو وما عدت أحكيه..بس مش من زمان لقيت الجواب".
وتابعت: هلي بيناتنا نحنا بالذات ت نضَل ماشيين عَ الأرض! هلي حمانا من ضو الشهرة والمال والجاه والتكبُّر والتعجرُف وكل ملذّات الحياة الفانية، هلي نقّى نفوسنا وقلوبنا وطهّرها! هلي رد عنّا ضربات الحقد الماكر والحسد والغيرة، هلي خلانا نضل مجموعين وخلّا هالبيت ما يعيش فيه الا الحُب، وخلا قلوبنا توزّع حب وفرح عالناس كل الناس، خلانا مرتبطين بالناس البُسطا اللي بيشبهونا ومنشبهن! مش عن عبث بِكره الحياة الإجتماعية اللي مليانة تصنّع وكذب وسطحية وظهور وحفلات وعهر وكفر وبَطر ونجومية! مش عن عبث ما برتاح إلا مع الناس الطيّبين بالضياع الخجولة والفلاحين والزرّاعين والحطّابين والعمّال الكادحين.. لاء.. منّي شيوعيّة.. لاء أنا مسيحيّة وهيك بتكون المسيحيّة الحقيقيّة! مش اللي مغطسة بتيجان الدهب ولا بالصلبان المشطوبة، ما حدا علّمني ما حدا ربّاني ما حدا لزَمني.. كون هيك!".
هلى علمنى الحب والتسامح
واستطردت: "هلي اللي ما بيِحكي وما بيِسمع وما بيِمشي هوّي اللي علّمني كل هول علّمني سامح وحب وأعطي أهلي عمري وحياتي متلما هوّي عطانا، وبحسب قناعة عاصي وكلام عاصي إلي "هلي وزّع ذكاه عليكي إنتي وزياد وليال بالتساوي! ولهيك لازم كتير تحبّوه لهلي!" أي يا بيّي هيّاني عم قول اللي بدَّك ياني، إنتَ وساكٍن العالي، قولو هلي يا ملاك البيت الله يحرسك ويطوّل عمرك ويخلّيك بركة هالبيت!".
