حرصت المطربة شيرين عبدالوهاب، على التواصل مع جمهورها عن طريق الرد على أسئلتهم عبر خاصية "الاستوري" بحسابها على موقع تداول الصور والفيديوهات "إنستجرام".
ويرصد موقع «ستوديو» أبرز تصريحات شيرين عبدالوهاب
- حاسة إن أنا وعمرو دياب، مش لايقين على بعض في دويتو غنائي، بس أكيد ممكن ودي حاجة أي حد يفرح بيها.
- وعن سؤال «إزاي بطنك دي كلها في كواليس يا معافر وتقولي قولون مستحيل دي بطن حامل؟»، ردت قائلة: "عندك حق تقولي كده أنا نفسي بحس إني والنبي يا أختي في السابع، بس للأسف دا قولون وبكتيريا حلزونية والتهابات في الأثنى عشر".
- لو نفسيتي وحشة يا بصلي، يا بنام يا بسمع د. مصطفى محمود لأني واخدة على كدا من زمان.
- ردت شيرين عبدالوهاب على تعليق سيدة من متابعيها: "أنا نفسيتي وحشة، وحاسة إني عايزة أموت نفسي"، قائلة: "أنا كمان شوفلنا حاجة لطيفة نموت بيها إحنا الاتنين".
- محمد صلاح خط أحمر بالنسبة ليا وأنا واحدة من اللي عارفة قيمة محمد صلاح كويس جدًا، فا دا سؤال هو أكبر منه وعلي فكرة لسه باعتلي رسالة بيسأل فيها عليا.
- أغنيتي الجديدة "وهي عاودتني الدنيا"، كلمات أحمد المالكي، ألحان تامر عاشور.
- أكثر شيخ بحب أسمعه هو الشيخ عبدالباسط عبدالصمد، الشيخ محمد عمران.
- أجابت عن سؤال زمان أعلنتي إنك بتعملي ماركة لبس خاصة بيكي لسه ناوية تعمليها؟، قائلة: "مشروع شغالة عليه".
- أكدت أنها تفتقد الصدق المطلق.
- وعن أكثر شيء بتحبيه في شخصيتك وشكلك؟، ردت: الصدق علشان أنا مش بحب الكذب، وبحب شكلي زي ما ربنا خلقني.
- وعن أفضل رواية بالنسبة لها؟، قالت: الخيط الرفيع للكاتب إحسان عبدالقدوس.
- ندمت إني حلقت شعري.
- كان نفسي أشتغل مع بليغ حمدي الله يرحمه.
- عندي حفلة إن شاء الله في شهر ٨.
وكانت آخر الحفلات التي أحيتها شيرين في دولة الكويت خلال شهر مايو الماضي، وظهرت فيها بالعباءة الخليجية السوداء، ولاحظ الجمهور اكتسابها وزنًا زائدًا، ورجّح عدد كبير منهم أنها حامل، إلا أنها كذّبت كل تلك الأخبار بعدما عاودت الظهور برشاقتها المعهودة.
