حل الكابتن التاريخي للنادي الأهلي، شادي محمد، ضيفًا على الإعلامية داليا فؤاد، في برنامج "ضرب نار" على قناة «القاهرة والناس»، مساء اليوم السبت، للكشف عن عدد من كواليس حياته الشخصية.
وقال الكابتن شادي محمد: "أنا طبعًا مع إقالة كيروش، أولًا هو ليه حاجات كويسة وحاجات وحشة جدًا، الكويس أنه أعطى لاعيبة فرص مكناش هنشوفها زي محمد عبدالمنعم إمام عاشور ومرموش، وكمدرب خططي بيدافع كويس جدًا بس في الشق الهجومي هو مذكرهوش في الكتاب اللي هو جاي بيه، اللي قاله كتاب التدريب قاله تدافع بس، وفيه حاجة سيئة جدًا بيعملها، لاعيبة بتلعب مش في مكانها فبتدي 40 أو 50% والناس كلها تقوله مينفعش فاستوعب الدرس بعد وقت طويل قوي، ثانيًا مدرب عالمي بالنتائج مليش دعوة عمل إيه بره وبالسابق فين النتائج مع منتخب بلدي صفر، ورايح كأس عالم مش مذاكر عيب أوي الكلام ده، إنت عايز منتخب السنغال يستقبلك بمزيكة حسب الله، إيه يا جماعة إنتوا هتنسونا الكورة عيب اللي بيحصل في الإعلام ده خافوا على بلدكوا واحترموها".
وتابع: "السنغال اللي قعدتنا فرق 70 كيلو لا ده عمل إداري، مش لازم أجيب فندق قريب، البطولة بتتخلق في مصر من المواقف الصعبة واسألوا بوركينا فاسو وغانا في خماسي 2008، بيبقى في صعاب تخليك تحقق البطولة مش لازم النومة والمخدة الكويسة حس بشعبك، وأنا مش بزايد والله، قالك اتعطلنا واللاعيبة اتوترت".
وعلق على صورة الكابتن إيهاب جلال، قائلًا: “كابتن إيهاب جلال ميستحقش يبقى مدير فني لمنتخب مصر، عايز أبقى أمين لما مسك نادي الزمالك قعد وقت صغير جدًا منتخب مصر الشعب كله وراك ومش هتستحمل الضغوط، عندك فكر حاجة للمستقبل تقدمها، كنت أتمنى الكابتن إيهاب يبقى موجود بصلاحيات مع مدير فني أجنبي كبير، عيب البلد العظيمة الكبيرة دي نتكلم في 3 مدربين، حسام حسن بخاف من عصبيته تعمل مشاكل”.
