كشفت الفنانة دينا الشربيني، عن عدد من كواليس حياتها الشخصية خلال برنامج تليفزيوني منذ قليل.
وقالت، خلال حوارها ببرنامج "حبر سري"، مع الإعلامية أسما إبراهيم، على قناة القاهرة والناس، مساء اليوم الخميس: "الممثل دا بيمثل شخصية مش هو، فلو في دور الرسالة بتاعته حد يتعظ، الشخصية دي لو حتى وحشة في الحياة، وفي النهاية بتقتنع، دي حاجة مطلوبة في الشغلانة، الناس دايمًا بتربط إللي إنتى بتعمليه".
وتعليقًا على سؤال: “وإنتي بتختاري أي دور بتعملي حساب لأهلك والناس اللي بتتفرج؟”، قالت: "آه بعمل حساب لأهلي في حاجات كتير، لسه معملتش حاجة تخدش حياء حد، البني آدمين وطريقة تفكيرهم برده بتتغير، في أدوار بتعمل فرق في الناس أنا معملتش حاجة كدا".
وأكدت أن والدتها لم ترفض دخولها التمثيل نهائيًا، متابعة: “بابا كان معايا وداعم ليا، ماما كانت خايفة عليا، دلوقتي تجمع صحابها، تعالوا نتفرج على مسلسل دينا”.
وردت على سؤال: "ناس قالوا إن كميتك مع كريم عبدالعزيز مش راكبة؟"، قائلة: "ليه دا أنا بحبه أوي، أنا مشوفتش حد مبيحبش كريم عبدالعزيز، أو بيبقى مش عاوز يروح يسلم عليه، فيلم البعض لا يذهب للمأذون مرتين، أنا بحبه، وبجد كريم مبيعملش حاجة عادية هو جميل".
وأجابت عن سؤال: "بتزعلي لما حد يقول إنك حققتي شهرة كبيرة بسبب أزماتك الشخصية؟"، قالت: "الحتة دي بحس إنها مش حقيقية، مش هقول على نفسي شاطرة، أنا دايمًا بأنب نفسي في شغلي وممكن أعمل مشاهد أحسن من كدا".
