انتقدت الفنانة رجاء حسين، إطلالات الفنانات خلال دورات المهرجانات السينمائية في الفترة الماضية، قائلة: "أرفض العري والإسفاف رفضًا مطلقًا، أنا ست شرقية واللي بيحصل ده حرام وميرضيش ربنا، عمرنا ما سمعنا أن فنانات زمان كانوا يظهرن بهذه الطريقة".
وأضافت خلال حوارها ببرنامج "الستات"، مع الإعلاميتين سهير جودة، ومفيدة شيحة،المذاع عبر فضائية «النهار»: "أنا دقة قديمة وشوفت السيدة فاتن حمامة لما كانت بتحضر مهرجانات، كانت ملابسها محترمة وإطلالتها أنيقة".
ووجهت الفنانة رجاء حسين، رسالة لرجال الأعمال: «ابعدوا عن السينما والفن، اللي بيحصل حاليًا تجارة، ولا يمت بصلة للفن المصري، وأرفض تعبير أنه يمثل مصر»، متسائلة: "هو اللي كان بيحصل في المهرجانات كان يعجب حد؟".
وتابعت: "ده رأيي ومش هخالف ضميري وأقول كلام عكسه، وبعدين خسارة فيهم الكلام، ده مش مهرجان سينما ده عرض أزياء".
اشتغلت من صغرى عشان أساعد والدى فى تربية إخواتى
وقالت الفنانة رجاء حسين، إنها بدأت رحلتها الفنية في سن مبكرة، مضيفة: "اشتغلت في المسرح والسينما في سن 17 سنة، عشان أساعد والدي في تربية إخواتي، مكنش معانا غير معاش والدي وكان لازم أشتغل علشان أصرف على إخواتي وأجوزهم".
وأضافت: "جوزت كل إخواتي وللأسف كلهم ماتوا قبلي وحضرت غسلهم ودفنهم، وكنت دايمًا أسأل نفسي ليه كلهم سابوني ومشيوا قبلي؟".
وتابعت: "أنا بحب أعمل كل حاجة في بيتي بنفسي، من أول الطبخ وحتى فنجان القهوة، بحب أطبخ وأغسل وأعمل كل حاجة في البيت"، متابعة: "أعشق الكشري والمسقعة وبحب أعملهم بإيدي".
