أشعلت أغنية "عيش بشوقك"، أزمة بين الفنان تامر حسني، والفنان حمادة هلال، بعدما صرح الأخير بأن تلك الأغنية كانت في الأصل له واستمر في العمل عليها لمدة 6 أشهر، متهمًا الفنان تامر حسني بسرقتها.
حمادة هلال: اشتغلت على الأغنية 6 أشهر وفي أسبوعين راحت مني
وقال النجم حمادة هلال خلال لقائه ببرنامج "حبر سري" الذي يُذاع على شاشة "القاهرة والناس": "الغنوة دي بتاعتي وأنا اشتغلت عليها 6 شهور والمؤلف والملحن عارفين ده كويس، وبعدين انشغلت في تعب أمي الله يرحمها ولقيت الغنوة راحت في حتة تانية قولتلهم الغنوة دي بتاعتي، قالوا إحنا قرأنا فاتحة مع أحمد علي الملحن".
وتابع: "بعد 15 يوما لقيت إن مفيش حاجة حصلت، كلمتهم وقولتلهم هي الفاتحة دي تمشي على أحمد علي وماتمشيش عليا؟ أنا كان ممكن أزعل اللي عملها وأطلع تاني يوم على السوشيال ميديا بس قولت ليه هعمل كده، يمكن لو عملت كده وحرقت دمهم ممكن ربنا يحرق دمي، كان المفروض يبقى في تنازل بس الحمد لله، وأنا مش فارق معايا الغنوة".
وعن تواصله مع فريق عمل الأغنية قال "أنا كلمت الزميل والمنتج وكلهم وقلتلهم دي بتاعتي والـ15 يوم أنا قاعد تحت رجل أمي والأغنية أنا شقيان فيها فليه بتعملوا كدة ولو حد غيري كان نزلها وحرق دمهم بس استعوضت ربنا".
كما عبر حمادة هلال عن صدمته في الأشخاص وأكد أنه ليس حزينًا على فقدان الأغنية، متابعا: "أنا كنت فرحان بالأغنية دي، وكنت أقدر أزعل اللي حولوا مسار الأغنية، وكنت ممكن أنزل تاني يوم بها على السوشيال ميديا، ولكن استعوضت ربنا، وربنا عوضني بعدها على طول بأغنية (اشرب شاي) اللي كسرت الدنيا وبقت غنوة وإعلان، والفترة دي مش هنساها".
مسلسل المداح
ومن المقرر أن يشارك الفنان حمادة هلال، في الموسم الرمضاني المقبل 2022، بمسلسل «المداح»، ويشاركه البطولة الفنانة هبة مجدي.
برنامج "حبر سري" يذاع في الحادية عشرة مساء يومي الخميس والجمعة، على "القاهرة والناس" من تقديم الإعلامية أسما إبراهيم، وإخراج ميلاد أبي رعد.
