هاجمت الإعلامية بسمة وهبة معلني الوصفات الطبية ووصفات الأعشاب غير المرخصة: "الموضوع بقى مستفز، وكل ما أمسك ريموت التليفزيون ألاقي في وشي كمية من الناس دكاترة وكل واحد منهم بيخرج بعلبة شكلها غريب ويقولوا دي اللي هتخسس وهتصغر وتشيل التجاعيد".
أضافت وهبة خلال تقديم حلقة اليوم من برنامج "90 دقيقة"، المذاع عبر فضائية “المحور”: "أي واحد بيقول الكلام ده اعرفوا إنه نصاب ومش دكتور، وعشان كده كنت متحفظة قبل ما أقول عليهم دكاترة، دول مافيا بيضحكوا علينا، الموضوع مخيف من كتر الأدوية المجهولة اللي بتتصدر لنا منهم".
وتابعت في معرض تعليقها على إلقاء القبض على الصيدلي أحمد أبوالنصر المعروف إعلاميًا بـ"طبيب الكركمين": "أصحاب المعاناة يقعون تحت تأثير أي وعد أو حلم مثل حل مشكلة سقوط الشعر، لأن الغريق يكون معلقا بقشة".
وواصلت "أنّ ما زاد هذه المصيبة، تعامل هذه المافيا مع الأمراض المزمنة، مثل السكري والضغط والقلب، وكأنهم تفوقوا على الأطباء الحقيقيين وكبرى شركات الأدوية في العالم في حل مشكلات هذه الأمراض بحبة أو علبة".
بعض صفحات فيسبوك تتبنى هذه الأدوية
وأوضحت: "بعض صفحات فيسبوك تتبنى هذه الأدوية، مش بيجي لنا من السوشيال غير المصايب، وبعض البرامج الطبية تستضيف ناس المفروض إنهم أطباء لكنهم عمليا وواقعيا مجرد شوية تجار كل همهم إنهم يقلبوا الناس في أي قرشين، والله ما بيمسوا الطب من قريب أو بعيد".
