«راقصات وفنانين رايحين يركبوا التريند».. منة فضالى تهاجم مهرجان الجونة

حلت الفنانة منة فضالي، ضيفة على إنجي القاضي في برنامج "مساء "dmc، أمس الأحد، وانتقدت ما يحدث من قبل بعض الفنانين خلال حضور مهرجان الجونة في دورته الخامسة، كما انتقدت الفساتين التي اتسمت بالعري، وحضور الراقصات الذي أثار استياءها كونه مهرجانا للفن.

ونبرز في هذا التقرير أبرز تصريحات منة فضالي

 

- "مش حابة أكون رايحة أتصور".. منة فضالي تكشف سبب غيابها عن الجونة

كشفت الفنانة منة فضالي سبب غيابها عن فعاليات الدورة الخامسة لمهرجان الجونة السينمائي المقامة حاليا.

وخلال لقائها مع الإعلامية إنجي القاضي في برنامج "مساء dmc"، قالت منة فضالي: "أولا أنا مبحبش أبقى متواجدة في حاجة أنا مليش تواجد فيها. عشان أروح مهرجان لازم أكون مثلا عندي تكريم مش حابة أكون رايحة أتصور، وطبعا مش بسىء لحد".

- منة فضالي: راقصات في مهرجان الجونة مش واجهة للفن

أعربت الفنانة منة فضالي، عن استيائها من تواجد الراقصات في مهرجان الجونة قائلة: "أنا بقيت بشوف ناس غريبة على الريد كاربت معرفش مين دول ومعرفش الناس بتعزمهم إزاي أو بيسمحوا بدخولهم إزاي، فدي حاجة برضوا مبتبقاش مفهومة لأنهم مش واجهة للفن".

وتابعت: "مؤخراً أنا لقيت راقصات في الجونة، وده جديد بالنسبة لينا، وأنا بحترم الرقص جدآ وبحبه، ومش بسيئ له، بس أنتي بتكلمي عن وجهة أنتي بتقدمي فن فطبعا اللي هيكونوا موجودين لازم يكون ممثلين منتجين ومخرجين ونجوم عالمية، وفي ناس مينفعش تتواجد".

- منة فضالى: رانيا يوسف جريئة ومش بتاعه تريند  

علقت الفنانة منة فضالي، على إطلالة الفنانة رانيا يوسف في مهرجان الجونة، قائلة: "رانيا يوسف كانت لابسة فستان حلو وشيك جداً".

وأضافت: "أنا مش بتحفظ على رانيا يوسف لأنها جريئة طول عمرها ودي أحلى حاجة فيها".

وتابعت: "رانيا يوسف بتقول أنا ألبس اللي أنا عايزاه .. وده معناه إنها مش بتلبس عشان تركب التريند .. رانيا طول عمرها بتلبس اللي يليق عليها".

- منة فضالي عن إطلالات بعض الفنانات: رايحين عشان يركبوا التريند

علقت الفنانة منة فضالي على إطلالات الفنانات في مهرجان الجونة، قائلة: "أنا واحدة طبيعتي بسيطة ومش بحب الشو.. ومبحبش ألبس حاجة غريبة مش شبهي.. فيه لبس وألوان فاقعة مينفش تتلبس.. في النهاية احنا في مجتمع شرقي وفيه لبس الناس مبتقبلهوش".

وأضافت منة فضالي: "أنا بقبل النقد في كل حاجة عادي.. ومعنديش مانع إن حد يقولي إيه يا منة اللي إنتي لبساه ده".

وتابعت: "اللي بيحضروا المهرجانات.. يبقوا رايحين كل واحدة عايزة تكون لابسة أحسن وأحلى من غيرها.. وده أمر طبيعي لأن كل واحد بيبقى عايز يظهر شيك أوي".

وواصلت: "الفنانة اللي هي بتختار تلبس إيه.. وبتختار إنها تثير الجدل.. أو إنها تبقى شيك وبسيطة.. فيه فرق بين واحدة تظهر شيك وواحدة عايزة تلفت النظر وتركب التريند بس".