علّق الإعلامي تامر أمين على تصريحات الفنانة رانيا يوسف الأخيرة عن الحجاب التي أثارت الجدل إعلاميًا وعبر مواقع التواصل الاجتماعي.
وقال أمين خلال تقديمه برنامج «آخر النهار» المذاع عبر فضائية «النهار» مساء اليوم، إنني تجنبت التعليق عن تصريحات رانيا يوسف عن «مؤخرتها» مع أحد البرامج، لكني صُدمت أكثر عندما أفرجوا عن الحوار كاملًا، ورأيت ردها عندما سألها المذيع سؤالا عاديا وقال «ممكن في يوم من الأيام تتحجبي يا رانيا؟»، وكان طبيعيا إنها تقوله «لا والله أنا مبفكرش أو مش في دماغي» وهي كدة لها مطلق الحرية.
وتابع مقدم برنامج «آخر النهار»: «تصريحات رانيا يوسف عن الحجاب كان لا بد معها من وقفة، يعني إيه تقول "ياساتر ليه؟ إحنا من إمتى كنا محجبات، إحنا المصريين مكناش محجبات، وهو اتفرض علينا في التمانينات، وعمر زوجات شيوخ الأزهر ما شوفناهم محجبات، ولا شوفنا بناتهم محجبات، أنا لا أؤمن إنه فرض، ولو فرض كان اتفرض علينا من 1450 سنة على المسلمين أجمعين؟».
واستكمل: «لا حول ولا قوة إلا بالله، إيه يا بنت الحلال اللي إنتي بتقوليه ده، بجد نصيحة لرانيا يوسف لوجه الله: "لو مبنعرفش نتكلم منعملش حوارات، مفيهاش حاجة، طالما مبعرفش لساني يقول إيه وبلخبط اللخبطة السودة دي وبوقع نفسي في بلاوي سودة ومشاكل و "جرائم" يبقى أسكت».
وواصل: «ما تقولي للمذيع مش عايزه أتحجب
ليه تقولي له ياساتر يارب؟، وبعدين اتفرض علينا في الثمانينات؟ ده على أساس إن
الهجرة كانت سنة 1980؟ والقرآن نزل سنة 1984؟ معقبًا : إيه الكلام ده! أستغفر الله من كل ذنب الواحد مش عارف يقول
إيه».
وأضاف: «بعدين متسكتش لأ، دي قامت "ملغوصة"، وتقول هما من إمتى ستات شيوخ الأزهر اتحجبوا، يانهار أسود!، دي قامت لاطشة في شيوخ الأزهر كلهم وعلمائه وسيداتهم وتقول ستات الأزهر وبنات الأزهر عمرهم ما كانو محجبات.. يا سلام! أمال إيه كانوا بيشتغلوا في شارع الهرم! أستغفر الله العظيم من كل ذنب عظيم أنا بجد مش عارف أقول إيه، لأ لأ دي إهانة».
وأكد: «باعتباري مسلما مش مواطن ولا إعلامي، باعتباري مسلما، وشايف إن الأزهر هو القيمة والقامة التي تمثلنا وتمثل الإسلام بهذا البلد، فأنا أقول إن الأزهر لا يجب أن يسكت على مثل هذه الإهانة، فإنتي يا رانيا يوسف آراؤك الشخصية إنتي حرة فيها، لكن تقولي إن نساء شيوخ علماء الأزهر وبناتهم عمرهم ما كانوا محجبات؟ ليه؟ بأمارة إيه هذا الإفتاء المضل جبتيه بناءً على إيه؟».
وتابع: «أطالب الأزهر بتوقيع عقاب عليها، لأن ذلك إهانة لنساء وشيوخ وعلماء الأزهر وبناتهن اللاتي نقدرهن تقديرًا كاملًا، وأنا شخصيًا بعتذر لهم، بعتذر لشيخ الأزهر وعلماء الأزهر، ونساء الأزهر وعالمات الأزهر وبنات الأزهر، لأن الحقيقة هذا الكلام يخص قائلته "رانيا يوسف" لكننا جميعًا مع احترام الأزهر وإنها المؤسسة الدينية التي نفخر بها».
وشدد: «يا رانيا ده كلام ميتسكتش عليه،
ولازم يطلع منك اعتذار صريح، وهنا متقوليش "كنت بهزر"، لأ اعتذار صريح،
ومع الاعتذار لازم الأزهر يوقع عقاب ويدافع عن شيوخه وعلمائه وعرضه، مختتمًا:
«لاحول ولا قوة إلا بالله».
وعن ما ترتديه من فساتين تثير الجدل في
المهرجانات، قال: "خدي بالك يا رانيا التريندات اللي انتي بتحاولي تعمليها
بالفساتين اللي فيها عُريّ وفاضحة يكشف أكثر ما يستر ويظهر أكثر ما يبطن بذكر
"البطانة" يعني."
