أعاد الفنان رامي صبري، نشر إشادة عمرو دياب له، بعد غنائه أغنية محسود، وكتب عمرو تغريدة، عبر حسابه الرسمي بموقع "تويتر": "الله الله إيه الحلاوة دي، دي المنافسة بقت شديدة أوي، أحسنت يا رامي".
وعلق رامي صبري، عبر حسابه بموقع "إنستجرام": "أولاً أنا عملت تحدي لأغنية محسود علشان حاجتين، أولهم علشان الأغنية حلوة أوي وأنا بحب النوع ده من الأغاني ألحان صديقي، الملحن خالد عز".
وأضاف رامي: "ثانياً علشان أقول لناس كتير من الجماهير إن العلاقة بيني وبين الفنان الكبير عمرو دياب علاقة محترمة من عندي ومن عنده حتى الكلام اللي وحش اللي دايما بشوفه على السوشيال ميديا مكانش بيغير حبي واحترامي ليه بالعكس أنا كنت بشتغل أكتر إني أعمل أغاني مهمة وده حصل أخيرا من النهارده عايز كل الجمهور الكبير جمهور عمرو دياب يفهم إني بحترم هذا الرجل وبحترم تاريخه جدا ومفيش بينا أي عداوة أو كره ذي ما بعض الناس بتقول، مبروك الألبوم يا هضبة ودايما مشرفنا وفخورين بيك وشكرا لكلامك الحلو".
وهنأ صناع العمل قائلا: "مبروك لكل صناع الأغنية الحلوة دى.. الشاعر الكبير تركي آل الشيخ، الملحن الكبير خالد عز، الموزع الكبير عادل حقي".
وطرح الهضبة ظهر الثلاثاء عبر قناته الرسمية على موقع "يوتيوب"، برومو أغنية "يا أنا يا لأ"، والتي سيحمل اسمها الألبوم المقرر صدوره يوم 25 ديسمبر الحالي.
