رئيس مجلس التحرير
د.محمد الباز
رئيس التحرير
وائل لطفى

«انقلب السحر على الساحر».. حرب كلامية بين مطربى المهرجانات حمو بيكا وعمر كمال

ستوديو
طباعة

شن مطرب المهرجانات حمو بيكا، حربًا كلامية على عمر كمال، وحسن شاكوش، عبر صفحاته على مواقع التواصل الاجتماعي.

ونشر حمو بيكا، صورة لعمر كمال عبر صفحته الشخصية بموقع "فيس بوك"، وعلق عليها قائلًا: "يا ريت محدش يكلمنى في شغل على الشخصية دى، عشان أنا كنت بحبها، والشخصية دى بتتهرب من شغلى اللى خلانى أتفق عليه، والإثبات بعد الصورة دى هنزل فيديو، هو عامل بيحبنى وهو بيكرهنى، مع السلامة يا صحاب مزيفة".

ورد عمر كمال على هجوم حمو بيكا من خلال بث مباشر عبر صفحته الشخصية بموقع "فيس بوك"، قائلًا: "أنا تحملت كتير جدا إهانات بعض الناس، لكن أنا ممكن أطلع أقولك يا (أبوكرش) لكن كل ده كلام قلة أدب وقلة ذوق ماليش فيه ومش بحب أقولها".

وأضاف: "أنا أول أغنية أكسب منها على قناتي كانت أغنية (إنتي معلمة) وكل الأغاني اللي قبل كده كنت بديها لحمو بيكا ولباقي الناس، عشان يرفعها على قناته ويكسب منها بما فيها أغاني كانت من إنتاجى أنا، والله مكنتش باخد فلوسها لأني بكسب من زمان وسيبتك تاكل عيش".

وأضاف: "الشخص اللي بيتكلم عليا ده أول ما بينزل القاهرة بييجي على شقتى وواكلين عيش وملح مع بعض، اللي حصل إن وأنا قاعد عند الحلاق بتاعي ومعايا حمو فوجئت إنه جايب واحد صاحب سنتر بتاع فساتين وعايزنا نعمله إعلان من غير ما ياخد إذنى، وأنا اتحرجت أرفض قدام الراجل، بس أنا مش عايز أعمل مهرجان لبوتيك فساتين أفراح، أنا عايز أعمل فن كويس زى بنت الجيران وعود البطل وكل مهرجاناتى، وحتى بعد الاتفاق ولا سألنى تاخد كام، على عكس ما بعمل معاه في أى فرح حد بيطلبه فيه".

وتابع: "عيب تقول عليا إني صحبة مزيفة محدش وقف معاك قدي، ممكن تكون فلوسك دلوقتي مش مناسباني أنا عمري ما كسبت من وراك، طول عمري بسيب للناس شغلى وتراكاتي تكسب من ورايا..أنا اللي بتكلملك مع نقابة الموسيقين ومع أستاذ هاني شاكر في مشكلتك الأخيرة، وتراك إنتي معلمة سبب تأخيره وجودك معايا فيه وأنا اللي رحت واتكلمت وقولتهم ده قلبه أبيض ومفيش كلام فيه إسفاف.. وعيب يا بيكا تكتب بوست كدة إحنا كلنا عيش وملح مع بعض في بيتي اتصل بيا قولي، عيب تقول عمر كمال صحبة مزيفة.. أنا سيبتلك 12 تراك كلت من وراهم الشهد، حتى العربية بتاعتك أنا اتصدرت أنا ومدير أعمالي عند المعرض عشان يقسطهالك، وضمنتك في مليون و800 ألف جنيه، ولو كنت لوحدك مكنش حد هيديك عربية".

رد حمو بيكا مرة أخرى، فى فيديو عبر صفحته بموقع "فيس بوك"، قائلًا: "أنت كداب ومزيف..عايز تاخد فلوس تشتغل، مش تاخد فلوس وخلاص، طول عمرك بتغني فين، وأنت عايز تطلع نفسك من المهرجان بتغني ليه، المهرجانات هي اللي علتك، أنا عايزك تطلع تغني لوحدك.. إنت طول عمرك بتغني حزن محدش سمعك غير لما غنيت مهرجانات".

وكان حمو بيكا، قد شن هجومًا حادًا قبل أيام على مطرب المهرجانات حسن شاكوش، بعد تجاهل اسمه في الأكثر بحثًا على جوجل ووصفه بالأناني ووجه له رسالة قال فيها "خليك محترم وكويس".

إرسل لصديق

التعليقات