رئيس مجلسي الإدارة والتحرير
محمد الباز
رئيس مجلسى الإدارة والتحرير
محمد الباز

رضوى الشربينى «ضُرة».. قصة الزواج السرى المزعوم: «أنا ست بجحة»

رضوى الشربيني
رضوى الشربيني

تصدرت الإعلامية رضوى الشربيني، محركات البحث خلال الساعات الماضية، بعد تداول البعض شائعات حول ارتباطها سرًا، من السيد "سمير يوسف" الرئيس التنفيذي لمجموعة قنوات CBC، زوج الإعلامية منى الشاذلي.

ونفت رضوى ما تردد من شائعات، خلال بث مباشر قامت بمشاركته عبر حسابها الشخصي على موقع التواصل الاجتماعي "فيسبوك"، حول  زواجها، مؤكدة أنها مجرد شائعات مُغرضة الهدف منها تشويه اسمها في الوسط الإعلامي.

وقالت خلال البث المباشر: "لاقيت إشاعة غريبة جدًا ولأنها ما تخصنيش أنا لوحدي طالعة أتكلم، وده للمرة الثانية، وفي المرة الأولى طلع عليا إني مرتبطة بمواطن مغربي اسمًا وقولًا، واتقال إني هتجوزه، ودلوقتى لسه طالعة من الاستديو بنفس المكياج طلعت إشاعة غريبة، مش عارفة اتقال ليه، أو يمكن عارفة اتقال ليه في التوقيت ده بالذات".

وتابعت: "بقول للناس اللي بتحبني وما بتحبنيش أنا شخص مش مرتبط، ولما هرتبط كل الناس هتعرف، علشان أنا مش الست اللي بتعمل حاجة في الدرا ومش الست اللي بتعمل حاجة في الخفا، أنا بجحة كفاية أوي إن أي حاجة أعملها اطلع أقول إني بعملها، لأن الجواز مش عيب وبقول كده في برنامجي على طول اتجوزوا بس اختاروا صح".

وأضافت: "أنا ست مش مرتبطة، بربي بناتي وبشوف شغلي وبشوف مشاكل الستات، واللي بنقدر نحله بنحله، واللي مش بنقدر عليه بندعي ربنا إنه يحله، ولما ارتبط مش مصر هتعرف الوطن العربي كله هيعرف، ومش هتكلم تاني أكتر من كده علشان ما أديش الحاجة أكبر من حجمها".

وعن سبب ردها عن هذه الشائعة، تابعت: "طلعت رديت لأن رد الحق للناس المحترمة واجب، ولأني لاقيت وأنا جاية في العربية بعض التعليقات اللى زي ما يكون الناس كانت مستنية أو ما بتصدق، أو أنا مش عارفة.. ليه لما يتقال عليها - الناس اللي بيطلق عليهم مشاهير- حاجة حلوة مش بتتصدق، ولما بيتقال حاجة مش كويسة، بتتصدق وتجري كده، ربنا يهدي الجميع، ويهدي الشخص اللي فكر يكتب الكلمتين دول، بردو أنا مسامحاك لأني عارفة إنت عملت كده ليه، وواخد من مين علشان تكتب كده، وحياة ربنا، وربنا ما تصدقوش كل حاجة بتتقال، ما تصدقوش كل إشاعة، ما تصدقوش كل كلمتين، علشان إحنا بني آدمين، وعندنا أهل وعيال وسمعة، إحنا يقال علينا مشاهير، بس بنزعل وعندنا ناس بتزعل علينا.. ربنا يهدي الجميع، دول كلمتين طلعت أقولهم في حق ناس جزمتهم على راسي".

وأوضحت: "في ست تقبل إنها تتجوز راحل متجوز هي حرة، لكن أنا ما بقبلش ومش عايزة، فبقول للأستاذ فلان الفلاني دي جات فاول منك OUT لأن كل الناس تعرف من هي رضوي الشربيني اللى بتقول لكل واحدة ست حرام عليكي تكسري قلب ست متجوزة".