كلمة أبطال «الاختيار» خلال الندوة التثقيفية الـ 32 للقوات المسلحة

قال الفنان أمير كرارة: "كل سنة وحضراتكم طيبين، كل سنة وشعب مصر العظيم وجيش مصر العظيم بخير، أحب أشكر القوات المسلحة على الشرف اللي اديتهوني بأني أقدم رسالة مهمة زي رسالة مسلسل "الاختيار"، وأظن الرسالة وصلت".

 

وأضاف أمير كرارة، خلال كلمة أبطال مسلسل "الاختيار" خلال الندوة التثقيفية الـ 32 للقوات المسلحة بحضور الرئيس عبدالفتاح السيسي، اليوم الأحد: "من أول يوم رمضان وإحنا بنتكرم من كل الناس في كل الشوارع، بس النهارده التكريم الكبير قدام شعبنا العظيم، وقدام قواتنا المسلحة، وقدام سيادة رئيس الجمهورية شكرًا وتحيا مصر".

 

فيما قال الفنان أحمد العوضي: "كل سنة وحضراتكم طيبين بمناسبة ذكرى انتصار أكتوبر المجيد، شرف كبير ليا أني واقف قدام سيادتك النهاردة يا فندم ودي كانت أمنية من أمنياتي والحمد لله إني حققتها، فأنا بكن لسيادتك كل حب وتقدير واحترام".

 

وتابع: "الحقيقة أنا لما اترشحت في مسلسل الاختيار إني أجسد دور الخائن هشام عشماوي عشت في صراع نفسي إني إزاي هقدر أعبر عن كمية الكره والحقد والضغينة اللي بيكنها أهل الشر دول باسم الدين، واللي للأسف نالوا من كتير من شهدائنا الأبرار من أبطالنا وإخوتنا في الجيش والشرطة اللي نقطة دم كل واحد فيهم بتساوي ألف نقطة دم من أهل الشر".

 

وأردف: "سعادتي الحقيقية كانت ردود أفعال الناس في الشارع ورفضهم للفكر المتطرف، هنا حسيت أني أديت رسالتي أني وصلت جزء من الحقيقة بقد إيه الناس دي بتكره مصر والشعب المصري، والله المستعان يا فندم على كل أعداء الوطن".

 

وقالت الفنانة دينا فؤاد: كل سنة وسيادتك طيب، كل سنة والشعب المصري في أمن وأمان، كل سنة وجيشنا العظيم رافع رأسنا في العالم كله، كل سنة وأهالي الشرطة فخورين بأولادهم اللي ضحوا بدمهم من أجل تراب مصر، هما دول الأبطال الحقيقين، وفخورة أني بتكرم النهارده قدام سيادتك من القوات المسلحة في يوم انتصارات أكتوبر العظيم، وفخورة أني شاركت ولو بجزء بسيط في مسلسل الاختيار، كانت أهم رسالة هما أطفالنا وشبابنا اللي اتأثروا بالشهيد البطل أحمد المنسي وعملوا فيديوهات انتشرت على السوشيال ميديا، جيل المستقبل كان لازم يعرفوا إحنا مين وبنحارب إيه، بأحيي سيادتك وبأحيي كل الحضور شكرًا للقوات المسلحة".

 

بينما قال الفنان إسلام حافظ: كل سنة وكلنا طيبين، كل سنة ومصر دايمًا بخير، مع أول يوم تصوير ليا في مسلسل الاختيار كنت بلاقي زمايلي يجوا يقولولي خد بالك يا إسلام الشخصية دي هتخلي الناس تكرهك، خد بالك الناس هتشتمك في الشارع والحقيقة المصريين قاموا معايا بالواجب وزيادة، لكن أنا لما زمايلي كانوا بيقولولي كده كنت بخاف جدًا لربنا ميوفقنيش ومقدرش أوصل حجم الخثة والدنائة التي كان يمتلكها أبو سعد الجنوبي".

 

وتابع: "كان نفسي والدي يكون عايش وقت عرض المسلسل، لأنه كان محارب في 1967، وانتصر في 1973، وكان دايمًا يقولي الحرب مخلصتش، آخر حاجه عايز أقولها أن اللي ضحوا بأرواحهم عشان الأرض مش اسمهم طواغيت، اسمهم شهداء".

 

وقال الفنان عابد عناني: "كل سنة ومصر بخير، شكرًا سيادة الرئيس عبد الفتاح السيسي على الدعم اللي سيادتك بتقدمه للفن المصري، اللي خلى عندنا أعمال زي مسلسل الاختيار، اللي قدر يبين لكل الناس الفرق بين اللي بيضحوا بنفسهم عشان البلد دي، وما بين مشوشي العقل والعقيدة اللي كل تفكيرهم في مصالحهم الشخصية وأطماعهم وتحيا مصر".

 

فيما قال الفنان محمود حافظ: "أنا لما اتطلبت للتجنيد لم أنال شرف الخدمة العسكرية، لما عملت فيلم الممر ومسلسل الاختيار وإحنا بنصور وتعبانين وعارفين أن اللي جايين يضربونا دول زمايلنا وأن ده تمثيل، قولت أمال الأبطال الحقيقين اللي بيضحوا بحياتهم وإحنا نايمين في بيوتنا دول إيه، ساعتها بس يا فندم أني أحقق ولو بجزء بسيط بحكم أني قوة ناعمة أني أقدملكم الاختيار والممر.. تحيا مصر".

 

وقال الفنان أحمد الرافعي: "آخر عبارة قالها عمر الرفاعي سرور في الاختيار لـ هشام عشماوي قاله: (وَسَيَعْلَمُ الَّذِينَ ظَلَمُوا أَيَّ مُنقَلَبٍ يَنقَلِبُونَ)، النهارده كل ما هتتكرر ملحمة الاختيار كل اللي ضل ضلال عمر الرفاعي سرور وكل اللي شغله هيعلموا أي منقلب ينقلبون، أما أحمد الرافعي لو اختار أنه يقول كلمة في الموقف دي مش هيفوت الفرصة يا فندم أنه يقولك أنه بيحبك".