قال الناشط وائل غنيم، إن المقاول الأجير محمد علي يحاول تجسيد دور المصلح والمناضل.
ووجه «غنيم» عدة نصائح للمغرر بهم في فيديو له على صفحته بـ«فيس بوك»: «لو مشيت ورا محمد علي في كلام مش فاهمه والقطريين هما اللي بيمولوه يبقى القطريين راكبينك، بالتبعية أنت مركوب من دماغ محمد علي ومحمد علي مركوب من القطريين، واللي هيحرك الآخر هو اللي معاه فلوس، لا تسلم دماغك لوائل غنيم ولا تسلم دماغك لمحمد علي، ولا تسلم دماغك للرئيس عبدالفتاح السيسي إلا في إطار من القانون والدستور».
وقال: «الاقتداء الحقيقي هو اقتداء المعاملة، أنا واحد شفت إزاي حكومتنا بتوقع الدنيا من الفساد بتاعها، وكنت بشوف ناس بتاخد أراضي الدولة وتبيعها وتبقى مظبطة مع المسئولين، أنا قعدت مع ناس فسدة وشربت معاهم شاي وفهمت الدنيا».
وتابع: «أنا أول واحد نزل دعوة وأنا صاحب الدعوة لـ25 يناير ومحدش يقدر ينكر ده، وسميته يوم الثورة على الظلم والفساد والبطالة، وكتبت وصيتي كل الكلام ده على صفحة خالد سعيد، وكنت وقتها مفعمًا بفكرة يلا نغير الدنيا، وكنت شايف إن الشعوب العربية متخلفة عشان معندهاش ديمقراطية، والشعوب الغربية متقدمة عشان عندها ديمقراطية، وكانت وجهة نظري أن الدنيا بعد ما نثور الحكومة دي هتقع ونعمل حكومة ديمقراطية والدنيا تنصلح وتبقى آخر حلاوة».
واستكمل: «أنا فاهم إنه ساعتها الواحد مكنش شايف أي مسار بره أننا نخلص من هذه الطعمة الفاسدة التي على السطح، مثل أحمد عز وأصحابه، وخد بالك أنا كنت فاهم إن وزارة الداخلية وخصوصًا أمن الدولة دي الذراع الذي يمكن الفساد داخل الدولة، وهو نفسه اللي بيحمي من الفساد، بس إنت خد بالك لو ظابط الشرطة شغال في حتة فقيرة بقى في امتحان صعب في الحياة».
