أصدر المذيع خالد عليش، بيانًا عبر صفحته الرسمية بموقع التواصل الاجتماعي "فيسبوك"، كشف من خلاله عن صلة قرابته بـ "بيلي إيليش" مطربة البوب الأمريكية، مؤكدًا أنها أخته في الرضاعة، وابنة عمه أيضًا.
وكتب خالد عليش في بيانه: «بخصوص ما تم تداوله من فترة على مواقع التواصل الاجتماعي، وبعد الحفاظ على أقصى درجات ضبط النفس حتى لا أخوض في أسرار تخص أهل بيتي حيث إن حياتي الشخصية حق أصيل لي، ولا يحق لأحد التدخل فيها وإبداء رأيه سلبا او إيجابا.. إلا أنه قد نفد صبري، خصوصا أن كل اللي بيتكلم مش عارف ولا فاهم حاجة بس بيظيط وخلاص!!».
وأضاف: «فعلا بيلي إيليش أختي "في الرضاعة".. أبوها يبقي ابن عم ابويا بس هما على خلاف مع بعض عشان عمي أتجوز أمريكية وسما نفسه عبحميد ايليش بدل عليش واستعر من اسم العيلة».
وتابع عليش: «أنا مش فاكر أني قابلت بيلي غير مرة وإحنا في بيت عمتي الله يرحمها في الحلمية الجديدة، وهي بتحب تغني وترقص من زمان، ودلوقتي غنت "باد جاي" وربنا كرمها بقى في أمريكا وأنا اللي لسه كحيان».
وأردف: «أنا لسه باعتلها صينية كنافة على أمريكا في رمضان اللي فات، وبإذن الله كورونا تخلص بس ونلم الشمل من تاني، ولهذا أرجو من الصحفيين ورواد مواقع التواصل الاجتماعي تحري الدقة، عشان الكشري يحب الدقة».
