شاركت الفنانة رانيا فريد شوقي، متابعيها صورة لها برفقة شقيقاتها عبر صفحتها الشخصية بموقع "إنستجرام"، وعبرت عن افتقادها شقيقتها المنتجة ناهد شوقي، التي رحلت عن عالمنا أول أمس.
وقالت رانيا، في تعليقها على الصورة: "للأسف بنعتاد الأحباب في حياتنا كأنهم خالدين في الدنيا زي ما نعتاد النعم كأنها مستمرة إلى الأبد وده من عيوب البشر أختي الحبيبة الغالية ناهد أنا بعتذرلك لأني اعتدك في حياتي يمكن خيالي كان أضعف من إني أتصور فراقك يمكن خدتنا مشحانات الدنيا وربنا نور بصيرتنا ورجعنا لحضن بعض والحب اللي اتربينا عليه وحبنا لبابا كان دايمًا بيجمعنا، يمكن لإني تناسيت أننا بنكبر كلنا والعمر بيخلص يمكن لأني جيت الدنيا لقيتك أختي الكبيرة القوية العنيدة اللي ماتعرفش حاجة اسمها استسلام وإرادتها من حديد قوتك كانت بطمني عليكي".
وأضافت: "أنا مش عارفه أنا بكتب إيه بس اللي حساه أكبر بكتير من أي كلام، مازلت مش مستوعبة، ولما حد بيقول الله يرحمها بتخض، في الفترة الأخيرة كنت بشوف فيكي بابا بكل حركاته وطريقة كلامه ونظراته وهزارك، وقولت للأحفاد اللي ماشفوش جدهم ناهد بقت نسخة من جدكم، لما تشفوها كأنكم شفتوه، سبحان الله، والغريب إني من الشخصيات اللي بتخاف تدخل علي حد متوفي لإنه بيبقي آخر انطباع بيفضل في الذاكرة عن الشخص، لكن لما دخلت وشوفت وشك مبتسم كأنك نايمة وبتحلمي حلم جميل حسيت إنك شوفتي فريد ابنك بيستقبلك وخدك لحبايبك بابا وطنط هدي ومها أختنا، ده تفسيري لابتسامتك الهادية الجميلة الواضحة أو، ي اللي هونت علينا كلنا فراقك، واللي مش هتفارقني اللي باقي من عمري، كنتي راضية بكل أقدار الله ومسلمة أمرك لله".
وتابعت: "إلي أن نلتقي يا أختي سلميلي علي بابا وقوليله الحياة من غيرك مش حياة ونفسي يجيلي في الحلم بقاله فترة غايب عني، هتوحشيني أوي يا حتة من أبويا ومن قلبي".
موعد عزاء ناهد شوقي
وتم تشييع جثمان المنتجة ناهد شوقي، من مسجد الشرطة بالشيخ زايد، ومن المقرر أن يقام عزاؤها اليوم في مسجد الشرطة.
