كشفت الفنانة إيناس عزالدين، نجمة برنامج "أراب أيدول"، عن تفاصيل الأزمة الصحية الأخيرة التي تعرضت لها.
وقالت إيناس عزالدين، في منشور لها عبر حسابها الرسمي على موقع التواصل الاجتماعي "فيسبوك": "عارفين معني جملة يولد من رحم الألم أمل؟.. دي أنا عيشتها الأيام اللي فاتت بكل حذافيرها".
وأضافت: "نعم مريت بمواقف وصعوبات كتير في حياتي وتعب ومرض ونكبات كنت ببقى حاسة وأنا وسط المواقف إنها نهاية العالم بالنسبالي ولما بتعدي كنت بكتشف حكمة ربنا وإنها كانت بتبقى لصالحي علشان يشيل غشاوة ما من على عيني وكنت بحمده وبشكر عظيم فضله بس المرة دي كانت مختلفة تمامًا لأني كان بيني وبين الموت شعرة بس أجلي كان لسه ما جاش أو إن رحمة ربنا عليا كانت في إني أتعب وأرجع أتألم من تاني وأعمل منظار وأشعة بالصبغة وما يظهروش للأسف حجم الكارثة الحقيقية والدكتور يقرر يعملي العملية ويحدد معادها وقبل معاد العملية بيومين بالظبط حالتي تبدأ تتدهور لنزيف دموي وترجيع دموي فا أعمل العملية وأتلحق على آخر وقت وكأن ربنا مرتب المعاد علشان يلحقني".
جراحة لفصل الشرايين والأمعاء الملتصقة
وأردفت إيناس عزالدين: "رحمة ربنا عليا إني أبقى داخلة عملية على أساس ساعة ونص أو ساعتين بالكتير حسب ما ظاهر في نتائج المنظار والأشعة ويطلعوا كانوا غير دقيقين والعملية تتخطى الست ساعات ونص، ورحمة ربنا عليا إن دكتوري المعالج اللي دايمًا متعود يبسط الأمور ويقولي الموضوع بسيط وسهل هو وفريقه الطبي ألاقيهم بيقولولي إن العملية كانت صعبة وخطيرة وعدد قليل من الجراحين في مصر اللي يقدر يعملها وإن فصل الشرايين والأوردة والأمعاء الملتصقين تمامًا في بعض وفي الحجاب الحاجز والمعدة لوحدهم أخدوا أربع ساعات لأن لو كان أي جزء اتشد بشدة شوية كنت روحت فيها تمامًا وبعدها كملوا استقطاع الاثني عشر وجزء كبير جدًا من الأمعاء الدقيقة فاالدكتور اشتغل بصبر شديد وبطء شديد لصعوبة الحالة لدرجة إن الدكتور المساعد بيقولي إنتي إزاي وصلتي للحالة دي".
وتابعت: "رحمة ربنا هنا ما كانتش في الابتلاء لأنه قدر ومكتوب عليا وهعيشه هعيشه رحمة ربنا عليا كانت في تخفيف الابتلاء كانت في رد القضاء كانت في شيء بيني وبين رب العالمين خلاه ينجيني ويحميني ويرعاني بعينه التي لا تنام هو بيبتلينا علشان يختبرنا ويختبر حبنا ليه وإيماننا بيه وبقدره وبيرحمنا برحمته الواسعة لو بيننا وبينه خطوة بنسعى ليه فيها مش لازم الناس تشوفها ولا تعرفها بس تخيل يكون بينك وبينه عمار بينك وبينه طريق بينك وبينه رسايل وكلام أهي المحنة دي برغم شدتها وألمها وصعوبتها إلا إنه خرج منها أمل عظيم وكبير كالعادة.. رحمتك يا رب وسعت كل شيء".
