أحيا الفنان أشرف عبدالباقي ذكرى وفاة الفنان علاء ولي الدين، التي توافق اليوم واستعاد معها ذكريات أول عمرة قضاها برفقته.
ذكريات أول عمرة مع علاء ولي الدين
ونشر أشرف عبدالباقي صورة لعلاء ولي الدين عبر صفحته الشخصية بموقع "إنستجرام"، وعلق على الصورة قائلا: "ربنا يرحمك يا علاء، زي النهاردة من عشرين سنة اتوفي علاء ربنا يرحمه ويغفر له يا رب وبرغم إن فات عشرين سنة على وفاته لكنه كان وما زال أقرب صديق ليا".
وأضاف: "أول مرة أطلع عمرة كان معاه وإحنا رايحين الكعبة قاللي بص في الأرض لغاية ما نوصل والكعبة تبقي باينة وأقولك بص وادعي ويمكن الحكاية دي بقيت أعملها مع أي حد يعمل عمرة لأول مرة وادعي لعلاء.. في حياته كنت بشوف الخير اللي بيعمله مع ناس كتير وأتعلم منه بشكل مباشر وغير مباشر".
وتابع: "علاقتنا كانت أكتر من إخوات ومن خلاله كنت بشوف باقي أصحابنا لأنه كان كريم جدًا ومضياف جدا وفي بيته كنت بحس إني في بيتي وأن والدته الله يرحمها زي والدتي اللي اتوفت وأنا في سن صغيرة وخالد أخوه الله يرحمه ومعتز ربنا يكرمه ويخليه لأولاده زي إخواتي وقت ماكنت إحس إني متضايق أروحله أتكلم معاه وأرتاح".
وأكمل: "ماكانش يعدي يوم إلا لما نتقابل أو نتكلم في التليفون نعرف أخبار بعض، وصادف إن يوم وفاته كان أول يوم عيد الأضحى وبعد ما وقف على الأضحية أتوفي وكنا على ميعاد يومها في المسرح لعرض مسرحية لما بابا ينام اللي انتهت بوفاته.. ربنا يرحمك يا علاء ويصبر أهلك وأصحابك اللي أكيد ما دام عرفوك عمرهم ما هينسوك".
