شارك الفنان تامر حسني، متابعيه، فيديو عبر حسابه على موقع التواصل الاجتماعي "إنستجرام".
وظهر تامر حسني في الفيديو وهو يتحدث من أحد الاستديوهات الإذاعية وعلق: “لو الوقت فلوس هتهدره كده؟؟ مهما مين رتبلك شر مفيش حاجة هتحصلك إلا اللي ربنا كاتبه فنطمن ونخلي طاقتنا اللي بتاخد من عمرنا لخدمتنا مش للتدوير ورا حياة الناس، ومين عمل إيه ومين راحت فين".
وتابع “الجيل الحالي فعلًا بيواجه فترة صعبة من التخبط، إحنا على الأقل لحقنا جيل أهالينا الطيبين وجيل الجيران الرحيمة والصداقات البريئة واحترام الآخر أيًا كان مين الجيل اللي علمنا لو ست كبيرة راكبة مواصلات وملهاش مكان، نقف إحنا وهي تقعد، الجيل الحالي اتولد لقى العالم كله باصص في حياته وبيحكم عليه من خلال سوشيال ميديا بلا رحمة فاضطر يبقى شبههم ويعمل زيهم جيل مش عارف يبقى في حاله ويركز لنفسه ويقرب من ربنا”.
وأضاف “أنه عشان كدا من ضمن الحلول إن أولادنا يحلموا بالنجاح والطموح بدري، لكل الأهالي اتمنى تشغلوا أطفالكم من الصغر في أي اهتمامات إيجابية، دوروا جواهم هتلاقوا ولو ملقيتوش ساعدوهم يلاقوا بالتوجيه لأي اتجاه ”رياضي، علمي، فني" يشغل تفكيرهم في الإيجاب عشان ينفدوا من اللي بيحصل من تفكك مجتمعي وأفكار قذرة دخيلة على ثقافتنا والأخبار السلبية المحاطين بيها ٢٤ ساعة من السوشيال ميديا".
واختتم: “لازم نعلمهم الاستخدام الإيجابي الصح للإنترنت والسوشيال ميديا والبحث عن كل ما هو نافع ليهم، عشان كدا قيمة الوقت مهمة اللي هنعمل فيها كل دا نبص للوقت إنه مهم زي الفلوس وأهم لأن الوقت دا الفترة اللي بتفكر فيها وبتشتغل فيها عشان تكسب يعني هو أهميته قبل المادة معقول لو الوقت فلوس هنرميه كدا وهنسمح لولادنا يهدروه كده !!!؟”.
