تحدثت الإعلامية مفيدة شيحة، عن رحمة أمين أحمد، والشهيرة إعلاميًا بفتاة ديلفري الإسكندرية، مشيدة بكفاحها مؤكدة أنها قدوة لفتيات هذا الجيل.
وقالت خلال حلقة برنامج "الستات"، المذاع عبر فضائية "النهار": "البنت الجدعة دي بتقول إنها تعرضت للتنمر وكلام من الناس سخيف ومكنش بيشجعها على اللي بتعمله.. وهي في سنها الصغير دا ومن غير كلام كتير وتضييع وقت فهمت بفطرتها وعقلها إن مفيش فايدة من الكلام دا.. عملت اللي مصدقه إنه صح وإنه في مصلحتها وكملت ومهمهاش.. فبقت قدوة و100 راجل".
وتابعت:"المقياس في الحياة إيه رضا الناس عنك؟ ولا أد إيه اللي بتعمله خير أو شر؟ ولو النجاح هو الأهم مهم بردو أنت بتختار تنجح في إيه وإزاي".
رحمة علمتنا إن التعب نعمة
وأردفت:"لو معندهاش اي فرصة للنجاح أو للشغل اشتغلت زي مهي بتقول (بصحتي) مشيت على رجليها بتوصل طلبات.. كم واحد يائس دلوقتي وفقد الأمل في المحاولات من مدة شاف رحمة؟. حسيت بإيه قصاد تجربة بنت في بداية حياتها بتساعد نفسها وتشتغل وهي بتدرس.. وفي الحقيقة هي بتساعدنا كلنا إننا نعرف أن التعب نفسه نعمة!".
وأكملت: "رحمة بتقول لكل بنت بشغلها وإيمانها بنفسها اعملي نفسك بنفسك.. حتى لو الظروف صعبة لو محدش وقف جنبك من بدري اقفى على رجليكي وعلمي نفسك واشتغلي واتعبي واتعلمي أكتر وهتطوري كل يوم وهتنجحي.. دون شك".
