وجه إسلام فتحي الثاني علمي علوم على مستوى الجمهورية، رسالة للطلبة المقبلين على الثانوية العامة، في العام المقبل، قائلًا: "يحاول ميتوترش، يعمل اللي عليه واللي يريح ضميره، لو عملت اللي عليك الباقي على ربنا".
وأضاف خلال مداخلة هاتفية مع الدكتور محمد الباز، في برنامج "آخر النهار" المذاع عبر فضائية "النهار": "لو جبت مجموع كلية مش عاوزها يبقى ربنا جايبلك الخير فيها، متندمش اعمل اللي عليك وبس".
ولفت إلى أنه كان يقضي بين 5 أو 6 ساعات في المذاكرة، مردفًا: "كان بالنسبة لي أهم حاجة الحل، وكنت مخطط للالتحاق بكلية الطب، وربنا وفقني"، مشيرًا إلى أنه كان يعتمد على منصات وزارة التربية والتعليم في شرح الدروس ونماذج الامتحانات، إلى جانب الدروس الخصوصية، لكن "درس واحد فقط في كل مادة".
من ناحيته، قالت زينب أكرم، الأولى أدبي على مستوى الجمهورية، في مداخلة ببرنامج "آخر النهار"، إنها لم تحسب عدد ساعات المذاكرة، وتفاجأت بأنها الأولى، مردفة: "متفاجئين، وغمرتنا الفرحة والحماس".
وعن رسالتها للطلبة المقبلين على الثانوية العامة، قالت زينب: "اعمل اللي عليك وخلي عندك يقين في ربنا، ربنا هيكتب لك الخير، اعمل اللي عليك عشان تبقى راضي، جبت 50% أو جبت 100% هتكون واثق إنك مقصرتش في حاجة".
