أعلنت خبيرة التجميل، إيمي تاتو، عن نيتها السفر للخارج، قائلة: "مش هقدر أقعد في البلد دي تاني وربنا ييسر ونطلع ألمانيا".
وقالت خلال بث مباشر، عبر حسابها الرسمي بموقع التواصل الاجتماعي، "فيسبوك": "أنا مش محتاجة برنامج اطلع فيه هدفي كله كان عشان أساعد الستات يقدروا ياخدوا عروض حلوة من دكاترة التجميل، بس واضح كدة ظهوري بجمهوري ده خوفهم وجابلهم تسلخات".
وأضافت: "أنا ربنا مراضيني في حاجات كتير بحب الناس وبابني ورضا أمي وبحب الأطفال ونجاحي في الشغل وأنا راضية الحمد لله ومستورة معايا".
ولمحت إلى انتقامها ممن يثيرون ضيقها، من خلال فتحها علبة "مكسرات"، مرددة: "اللي مفكر ماسك نفسه بغوزه واللي مضايقني بغوزه".
وتابعت: "الهجوم غير المنطقي مضايقني، أنا كنت في أحد البلاد العربية بتعاقب لو نقطة ضبغة وقعت غصب عني على الأرض، اللي تعب ربع تعبي يجي يكلمني".
وواصلت: "مش جزاتي بعد كل اللي عملته ده على مدار سنتين عملت فجوة في الأسعار وخفضتها لأكتر من الربع، ومش ده رد الجميل خالص، أنا بعامل مرات الوزير زي مرات البواب، وكلنا عند ربنا واحد إلا بالتقوى، ومقالش بالواسطة ولا بالشهادة ولا بالمال".
واستطردت: "أنا مال أمي بناس عاطلة مستنية اللي يجبلها الشغل لحد عندها، والفاشل بيعلق فشله على أي حاجة، والناجح اللي عايز ينجح، ربنا يبعتله الحماية، وأنا بقول يا رب وأول ما عمل التاتو بقول يا رب بيبعتلي الحماية والدعم وبقول يا رب استرها معايا، ولازم أسمي قبل ما أعمل التاتو، فيا ريت بطلوا تعلقوا فشلكم على شماعة غيركم".
كما وجهت إيمي تاتو، خبيرة التجميل، عدة رسائل لخريجي الإعلام المعترضين على تقديمها برنامج تليفزيوني، من خلال بث مباشر، على حسابها الرسمي بموقع التواصل الاجتماعي "فيسبوك".
وقالت إن أغلب العاملين معها، مؤهلات عليا منهم شهادتا إعلام، لافتة إلى أن لديها حارسها الشخصي خريج هندسة، موضحة: "واللي بتساعدني في البيت تمريض، ومحمد خريج إعلام، وأن السائق خريج هندسة ميكانيكا، والليس بيدور على الرزق مبيستناش".
وتابعت: "أنت قاعد فاضي وأنتي قاعدة فاضية، اشتريت بشقايا هوا، لا بواسطة ولا محسوبية، وهاتولي شائبة تشوب فلوسي، مش هتلاقوا، إنما أنتو الفضا قاتلكوا يا عاطل ياعاطلة منك ليها، انزلوا دوروا على شغل منك يا عاطل ويا عاطلة".
وواصلت: "بتعلقوا فشلكم عليا ليه، أنا لا خريجة إعلام ولا أفقه شئ فيه، ولكن إنسانة ناجحة، أما أنتو خدتوا الشهادة وبروزتوها، سأسأها، في كوباية ماية، انزل دور على شغل البلد مليانة شغل وكلنا خدامين لقمة عيش".
وأوضحت أنه تم تغيير الاتفاق معها، بعد الانتقادات التي طالت البرومو للبرنامج، وهي أن تخرج بفقرة واحدة مع مقدم البرنامج، وهذا لم تتفق عليه، لافتة إلى أنها ستصر على حصولها على الشرط الجزائي من قناة "الشمس".
وذكرت: "أنا بدأت من تحت الصفر، ومكنش عندي معلقة دهب، ومش ذنبي إنك عاطلة قاعدة في البيت، أنتو مشقتوش قد ماشقيت، ولا تعبتوا قد ما تعبت، أنا مشترية ظهوري على التليفزيون بفلوسي وشقايا".
وأكدت: "أنا كنت بهدف إلى تقديم عروض من خلال برنامجي لإظهار جمال سيدات مصر، عن طريق أطباء التجميل اللي كانوا هيقدموا تخفيضات من خلال برنامجي".
وكانت إيمى تاتو، خبيرة التجميل، أعلنت عن تقديمها فقرة في برنامج على إحدى القنوات الفضائية يخص المرأة والجمال والموضة، وتفاعل الجمهور على البرومو الأول للبرنامج، وسط اعتراض ورفض العديد من المتابعين.
