قال المخرج عمرو سلامة إنه مارس العمل السياسي في الفترة من 2011 لـ2013 بنوايا طيبة، مشيرا إلى أنه قرر الابتعاد عن السياسة بعد الإعلان الدستوري في 22 نوفمبر 2012.
وأضاف، خلال لقائه ببرنامج "آخر النهار" مع الدكتور محمد الباز، المُذاع على قناة "النهار": "كان عندي نوايا طيبة بس استنفدت في حاجات مش بتاعتي، وخدت مني سنتين، وبشكل واع قررت أنفصل عن الانغماس في أحداث النهاردة، وأفكر بشكل أعمق، يوم ظهور نتيجة انتخابات الرئاسة في 2012، ويومها جالي إحباط كبير لأن مش ده الخيال والطموح اللى خرجت علشانه".
وتابع: "آخر يوم اشتركت في مظاهرة كان 22 نوفمبر، وآخر مرة أكتب عن السياسة، لأن اليوم ده محبط جدا وبعدها حصل سلسلة من الإحباطات ومن وقتها قلت محتاج أتأنى في رؤيتي للأشياء، وطاقتي أوجهها لما أجيده وأعرفه وهو الفن".
وأردف: "السياسي بيلعب على حب الناس لمشروعه السياسي، لكن الفنان بيحاول يفكر ويتعب عشان يوصل بمشروعه للناس، وأرى أن اشتباك الفنان مع القضايا السياسية مهلك جدا وبياخد من مصداقيته أمام الناس".
