رئيس مجلسي الإدارة والتحرير
محمد الباز
رئيس مجلسى الإدارة والتحرير
محمد الباز

فؤاد المهندس: الريحانى ساعدنى في بداية مشوارى الفنى من خلال مسرح الجامعة

الفنان فؤاد المهندس
الفنان فؤاد المهندس

قال الفنان فؤاد المهندس إنه جمعته بالفنان نجيب الريحاني علاقة صداقة في بداية مشواره الفني.

وأكد، خلال حواره في إحدى البرامج التليفزيونية: “الريحاني ساعدني في بداية مشواري الفني من خلال مسرح الجامعة”، مضيفًا أن التعارف بيننا جاء حينما قررت الذهاب إليه في مسرحه بشارع عمادالدين، نيابة عن الفرقة المسرحية لكلية التجارة ليطلب منه إخراج مسرحية لفرقة الكلية.

وروى فؤاد المهندس تفاصيل اللقاء بينه وبين الريحاني، قائلًا: «كنت رايح له عشان آخد منه حديث في مسرحية، طبعا دخلت الأوضة اللي كان فيها مكتبه، وفضلت واقف متكلمتش وباصص له، لقيته بيقولي إنت مين؟، قولتله أنا تلميذ، وعاوز سيادتك في كلمتين كدا، قالي إنت بتشتغل إيه؟، قولت له أنا تلميذ في كلية التجارة وبعد ما اندمجنا في الكلام قلت له مش هتيجي تخرج لنا مسرحية الكلية، فوافق بعدما قال لي هخرج لشوية عيال فقلت له إحنا مش عيال إحنا رجالة عندنا حاجة وهتشوف بنفسك، فأعطاني مسرحية حكاية كل يوم وبالفعل وزع علينا الأدوار وحصلنا على كأس يوسف وهبي".


وتابع: «الريحاني اختار رواية اسمها حكاية كل يوم، وقالي تعملوها، ولما نشوف هتعملوا فيها إيه؟ وبدأ يخرجها لنا ووزع علينا الأدوار، ودخلنا بالمسرحية كاس يوسف وهبي، وخدنا الكاس ساعتها»، ومن بعدها استمرت العلاقة بين فؤاد المهندس والريحاني وأصبحت علاقة وطيدة.

وضحك قائلًا: "طوال فترة علاقتي بالريحاني مكنش عارف اسمي لأنه نساي، ودايما كان يندهلي بالتلميذ لم يكن يعرف اسمه وجيت في مرة قولت له، أنا اسمي فؤاد يا أستاذ نجيب، قالي يا سيدي أي حاجة، وأخيرا عرف اسمي وبقا يقول لي يا فؤاد».

واختتم المهندس، بأنه كان الممثل الوحيد الذي كان يسمح له «الريحاني» بالوقوف في الكواليس: «عشان أقف أتفرج عليه وهو بيمثل»، مشيرا إلى أنه كان عصبيًا للغاية: «في مرة كنت بقوله عاوزين نشوف الرواية دي، رد عليا بعصبية وقالي اسمع لو حبيبك عسل متلحسوش كله»، مضيفا أنه كان به نوع من الأنانية، وذلك يسمى بأنانية الفنان.