قال الإعلامي تامر أمين، إن السنوات تمر سريعًا، معقبًا: "مين يصدق إن مصر النهاردة تحتفل بالعيد التاسع لثورة 30 يونيو، تسع سنين مروا بالتمام والكمال على يوم ما نزلنا كلنا في الشوارع عشان ننقذ مصر".
وأضاف أمين، خلال تقديمه برنامج آخر النهار، المذاع عبر فضائية النهار، أن 30 يونيو هو اليوم الذي تمت فيه استعادة مصر من خاطفيها، متابعًا: "نزلنا عشان نوقف مصر على رجليها تاني بعد ما كانوا عايزين يوقعوها".
وتابع: "التسع سنوات تحس إنهم عدوا في لمح البصر، لكن الأهوال اللي شفناها من 2011 تحسسك إننا عجزنا بدري، لأننا خلال التسع سنوات وقبلهم بعامين أيضًا شاهدنا كل شيء ولعبنا كل الألعاب، وما شاهده جيل من المصريين خلال العشر سنوات الماضية هناك من يعيشون 60 سنة ويموتون ولا يشاهدون نصف ما شاهدناه.. كانوا عشر سنين كومبو، شفنا فيهم كل حاجة".
وأردف: "شفنا قبل 2011، وشفنا الفوضى الأمنية وحزب الكنبة والمقاومة الشعبية، وانتخابات 2012، وحكم الإخوان ومحمد مرسي وسنة كبيسة ما يعلم بيها إلا ربنا لحد ما ربنا فرجها وشال الابتلاء اللي كان حتى 30 يونيو"، معقبا: "اللي عنده وطن يبوس إيده وش وظهر".
