وجه المخرج عمرو سلامة رسالة خاصة للفنان ماجد الكدواني، كشف من خلال المميزات التي يتمتع بها الكدواني، بسبب حبه لعمله وخوفه الشديد عليه.
ونشر عمرو سلامة صورًا لهما من أعمال متعددة عبر صفحته الشخصية بموقع "إنستجرام"، وعلق عليها قائلًا: "من حظي إن أكثر ممثل اشتغلت معاه هو الأستاذ ماجد الكدواني، ثلاث أفلام على مدار ١٣ سنة، أسماء وشيخ جاكسون وبرا المنهج.. من بعد أول تعامل في فيلم أسماء، وأنا كل مشروع لما بخلص كتابته - وساعات وأنا في نص الكتابة - من أول الأسئلة اللي بسالها لنفسي، ماجد الكدواني ممكن يمثل أنهي دور في الفيلم".
وأضاف: "لما اتكلمت مع كذا مخرج صديق من اللي بيشتغلوا معاه، لاقيت التجارب مشابهة وانطباعنا تجاهه يكاد يكود متطابق، كلنا شايفينه الممثل المثالي اللي يتقاس عليه..هو الممثل المثالي، لإن عنده الأربع عوامل اللي صعب جدا يتحدوا في ممثل واحد، الموهبة، الاحتراف، الأخلاق، الكاريزما".
وتابع: "ممكن تلاقي ممثل موهوب جدا بس مش محترف، مش بيحترم مواعيده ولا عارف حدود مهنته ولا بيدي وقت وتركيز وجهد كافي لشغله.. ممكن يكون موهوب ومحترف بس أخلاقه مش تمام، عنده غيره سلبية، يضايق زمايله، يعامل الناس بشكل سخيف، عنده غرور وإحساس بالفوقية، مش واضح وصريح ويلف ويدور وإلخ".
وأردف: "ممكن يبقى موهوب ومحترف وأخلاقه رائعة، بس الناس ببساطة مش بتحبه، لو اتنطط في حاجز نفسي بينه وبين الناس".
الكدواني جوهرة ثمينة ونادرة
وأنهى كلامه قائلًا: "ماجد عنده الأربعة، علشان كده هو جوهرة ثمينة نادرة، وطبعا في ممثلين ثانيين كثير يتوافر عندهم الأربع عوامل وأكثر، لكن ماجد بالذات بطيبته بحنيته بعنيه وهي بتلمع لما الكاميرا تدور، بخوفه كطفل صغير على شغله، باحترامه للجميع بشكل بشوفه ساعات مرهق ليه، بيخليه له حتى كبيرة في قلبي وأتحدى إنها كمان في قلب كل اللي اشتغل معاه".
