"تعبانة ومتأزمة".. رحمة حسن تكشف تطورات حالتها الصحية وتهدد باللجوء للقانون

كشفت الفنانة رحمة حسن، تطورات حالتها الصحية وذلك بعد تعرضها لعضة كلب في الشارع بمنطقة حساسة.

وقالت رحمة حسن، في منشور عبر صفحتها الشخصية بموقع “إنستجرام”: “أنا حقيقي تعبانة ومتأزمة جدا.. وكوابيس ومش عارفة حتى أقرب من القطة بتاعتي وألعب معاها لأني خايفة عليها لحد ما اخلص العلاج.. النهاردة أخدت الجرعة التانية ولسه هكمل طبعا ده غير وجع الجرح حقيقي”.

وأضافت: “اللي عاوزة أقوله إن فعلا لو بعد شهر ما حصلش حاجة تخص الكلب وعلاجه وتغير سلوكه وعدم نزوله دون كمامة..أنا هروح آخد موقف قانوني لأني فعلا تعبانة جسديا ونفسيا جدا جدا وخايفة جدا يحصل ده لحد تاني وأكون أنا السبب إني ماخدتش موقف”.

تفاصيل الأزمة

وكشفت رحمة حسن، عن تفاصيل الحادث الذي تعرضت له قائلة: "إمبارح الساعة 11 بالليل كنت نازلة أجيب حاجة من السوبر ماركت جمب البيت، وكنت ماشية على الرصيف وكان فيه عربية بتركن جمبي عادي، فجأة الباب اتفتح ولقيت كلب (جيرمن شيبرد) تقريبا مش متأكدة أوي، بيهجم عليا بكل قوته، طبعًا حاولت أجري لكن للأسف الكلب كان قويًا وشرسًا ووقعني على الأرض، حاولت أقوم وأجري وصاحبته حاولت تشده، بس فك الليش بتاعه وعضني عضة كبيرة وغويطة بنابه في منطقة حساسة".

وأضافت: "صاحبة الكلب كتر خيرها أخذتني فورًا على مستشفى إمبابة، إدوني حقنة تطعيم الكلب ولسه فاضلي 4 هاخدهم خلال شهر، بس المشكلة إن من إمبارح الجرح بينزف دم كتير، وأنا طبعًا خايفة ومصدومة".

وأردفت: "تعبانة وعندي تروما من إمبارح، واللي واجعني أكتر إني مش عارفة أتصرف إزاي.. خصوصًا إني أكيد مش عايزة الكلب يتئذي، بس كمان مش عايزة أي إنسان كمان يتئذي ويتعض ويتبهدل في الشارع زيي.. أنا كنت بشوف الكلب ده دائمًا مع صاحبته بتمشي بيه في الشارع جمب البيت عندي، وعشان شكله شرس كنت بامشي بعيد عنه لما بشوفه، إمبارح صاحبة الكلب قالتلي متخافيش هو عض ولادي قبل كدا وتمام محصلش حاجة! طبعًا أنا اتصدمت لما عرفت إنها مش أول مرة الكلب يعض حد ومع ذلك هي سايباه عادي في الشارع من غير كمامة أو حد قوي يمسكه.. بجد حرام عليكم، الكلب لما بيكون حجمه كبير وشرس بيعتبر سلاح، وصاحبه مسئول مسئولية كاملة عنه ويحاسب على إهمال مسئوليته، خصوصًا لو إهماله تسبب لشخص تاني في أذى بدني يحتاج أكتر من 21 يوم علاج وأذى نفسي ماعرفش هايحتاج قد إيه عشان يخف".

وتابعت: "أنا كنت بحب أنزل أحط أكل وميه للكلاب والقطط تحت البيت، دلوقتي أنا حقيقي مرعوبة أقرب منهم وخايفة جدًا.. أنا بجد مش عارفة المفروض أعمل إيه عشان محدش تاني يتاذي".