بعد تعرضها لعضة كلب.. رحمة حسن تطمئن متابعيها وتكشف عن تطورات حالتها

وجهت الفنانة رحمة حسن رسالة شكر لكل من اطمأن عليها بعد استغاثتها لتعرضها لهجوم من كلب وقيامه بعضها في منطقة حساسة من جسدها.

وقالت في منشور جديد عبر صفحتها الشخصية بموقع “إنستجرام”: “أنا متشكرة جدا لاهتمامكم ولكل الناس اللي كلمتني تطمن عليا، وآسفه إني ماقدرتش أرد علي معظم الناس لأني كنت تعبانة ومش قادرة أتكلم، أنا روحت المستشفي النهارده وكشفت عند جراح متخصص وهو غيّر علي الجرح وعمل اللازم والحمد لله طمني، وقالي أتابع معاه الفترة الجاية وإني هاكون كويسة إن شاء الله والجرح هاياخد وقته وهايخف”.

وأضافت: “بالنسبة للكلب فإحنا اتكلمنا مع صاحبته وطلبنا منها توديه مركز تأهيل وتدريب علشان تعدل سلوكه، وتبعت لنا الورق الرسمي اللى بيثبت إنها ودت الكلب فعلا، وإلا هاعمل محضر.. وساعتها الكلب اللى هايتضر، ودي حاجة ماترضيش حد.. وهي كانت متفاهمة جدا ووافقت وقالت إنها هاتعمل كدا أول الشهر الجاي، علشان أخوها اللى هايوديه ويتولي مسئوليته”.

وطمأنت جمهورها على صحتها قائلة: “الحمد لله أنا كويسة والكلب كويس..وأتمني أن صاحبة الكلب تصدق في كلمتها وتودي الكلب فعلا مركز تعليم ويبقي كويس”.

تفاصيل الحادث

وكانت رحمة حسن قد كشفت عن تفاصيل الحادث الذي تعرضت له قائلة: "إمبارح الساعة 11 بالليل كنت نازلة أجيب حاجة من السوبر ماركت جمب البيت، وكنت ماشية على الرصيف وكان فيه عربية بتركن جمبي عادي، فجأة الباب اتفتح ولقيت كلب (جيرمن شيبرد) تقريبا مش متأكدة أوي، بيهجم عليا بكل قوته، طبعًا حاولت أجري لكن للأسف الكلب كان قويًا وشرسًا ووقعني على الأرض، حاولت أقوم وأجري وصاحبته حاولت تشده، بس فك الليش بتاعه وعضني عضة كبيرة وغويطة بنابه في منطقة حساسة".

وتابعت: "صاحبة الكلب كتر خيرها أخذتني فورًا على مستشفى إمبابة، إدوني حقنة تطعيم الكلب ولسه فاضلي 4 هاخدهم خلال شهر، بس المشكلة إن من إمبارح الجرح بينزف دم كتير، وأنا طبعًا خايفة ومصدومة".

وأردفت: "تعبانة وعندي تروما من إمبارح، واللي واجعني أكتر إني مش عارفة أتصرف إزاي.. خصوصًا إني أكيد مش عايزة الكلب يتئذي، بس كمان مش عايزة أي إنسان كمان يتئذي ويتعض ويتبهدل في الشارع زيي.. أنا كنت بشوف الكلب ده دائمًا مع صاحبته بتمشي بيه في الشارع جمب البيت عندي، وعشان شكله شرس كنت بامشي بعيد عنه لما بشوفه، إمبارح صاحبة الكلب قالتلي متخافيش هو عض ولادي قبل كدا وتمام محصلش حاجة! طبعًا أنا اتصدمت لما عرفت إنها مش أول مرة الكلب يعض حد ومع ذلك هي سايباه عادي في الشارع من غير كمامة أو حد قوي يمسكه.. بجد حرام عليكم، الكلب لما بيكون حجمه كبير وشرس بيعتبر سلاح، وصاحبه مسئول مسئولية كاملة عنه ويحاسب على إهمال مسئوليته، خصوصًا لو إهماله تسبب لشخص تاني في أذى بدني يحتاج أكتر من 21 يوم علاج وأذى نفسي ماعرفش هايحتاج قد إيه عشان يخف".

وأضافت: "أنا كنت بحب أنزل أحط أكل وميه للكلاب والقطط تحت البيت، دلوقتي أنا حقيقي مرعوبة أقرب منهم وخايفة جدًا.. أنا بجد مش عارفة المفروض أعمل إيه عشان محدش تاني يتاذي".