كشفت الفنانة رحمة حسن، تفاصيل الحادث الذي تعرضت له بعد هجوم كلب عليها وإصابتها في أماكن حساسة من جسدها.
ونشرت رحمة حسن، تدوينة عبر صفحتها الشخصية بموقع "إنستجرام"، قالت فيه: "إمبارح الساعة ١١ بالليل كنت نازله أجيب حاجة من السوبر ماركت جمب البيت، وكنت ماشية على الرصيف وكان في عربية بتركن جمبي عادي، فجأة الباب اتفتح ولقيت كلب (جيرمن شيبرد) تقريبا مَش متأكدة أوي، بيهجم عليا بكل قوته، طبعًا حاولت أجري لكن للأسف الكلب كان قويًا وشرسًا ووقعني على الأرض، حاولت أقوم وأجري وصاحبته حاولت تشده، بس فك الليش بتاعه وعضني عضة كبيرة وغويطة بنابه في منطقة حساسة".
وأضافت: "صاحبة الكلب كتر خيرها أخذتني فورًا على مستشفى إمبابة، إدوني حقنه تطعيم الكلب ولسه فاضلي ٤ هاخدهم خلال شهر، بس المشكلة إن من إمبارح الجرح بينزف دم كتير، وأنا طبعًا خايفة ومصدومة".
ليست هذه المرة الأولى للكلب
وتابعت: "تعبانه وعندي تروما من إمبارح، واللي واجعني اكتر إني مَش عارفه أتصرف إزاي.. خصوصًا إني أكيد مَش عايزه الكلب يتئذي، بس كمان مَش عايزه أي إنسان كمان يتئذي ويتعض ويتبهدل في الشارع زيي.. أنا كنت بشوف الكلب ده دائمًا مع صاحبته بتمشي بيه في الشارع جمب البيت عندي، وعشان شكله شرس كنت بامشي بعيد عنه لما بشوفه، إمبارح صاحبة الكلب قالتلي متخافيش هو عض ولادي قبل كدا وتمام محصلش حاجة! طبعًا أنا اتصدمت لما عرفت إنها مَش أول مرة الكلب يعض حد ومع ذلك هي سايباه عادي في الشارع من غير كمامة أو حد قوي يمسكه.. بجد حرام عليكم، الكلب لما بيكون حجمه كبير وشرس بيعتبر سلاح، وصاحبه مسئول مسئولية كاملة عنه ويحاسب على إهمال مسئوليته، خصوصًا لو إهماله تسبب لشخص تاني في أذى بدني يحتاج أكتر من ٢١ يوم علاج وأذى نفسي ماعرفش هايحتاج قد ايه عشان يخف".
واستطردت: "أنا كنت بحب أنزل أحط أكل ومايه للكلاب والقطط تحت البيت، دلوقتي أنا حقيقي مرعوبة أقرب منهم وخايفة جدًا.. أنا بجد مَش عارفة المفروض أعمل إيه عشان محدش تاني يتاذي".
