فى حوار سابق.. سهير البابلى: المسرح هو الأب الشرعى بالنسبة لى (فيديو)

قالت الفنانة سهير البابلي، إن التليفزيون يمثل لها "أخواتها"، لكن الأب الشرعي هو "المسرح"، والأم بالنسبة لها هي المسرح والتليفزيون والسينما مع بعض. 

رأي سهير البابلي في السينما والمسرح 

وأضافت الفنانة سهير البابلي، خلال لقاء سابق ببرنامج “حوار صريح جدًا” مع منى الحسيني، والمذاع عبر فضائية ماسيبرو زمان، “الجمهور وحشني جدًا، أنا مش هقول اتعرض عليا 70 سيناريو و70 فيلم ومحطوطين ومبعملهمش، والحاجات اللي بتتقال دي”، معقبة: "اتعرض عليا السنة دي مسلسلين وسهرتين.. حاجات على أدي، لكن أنا رفضتهم لأني بقول إنهم مش بتوعي لكنهم بتوع فنانين تانيين".

وتابعت مازحة: "يعني أنا مقدرش أعملهم، صعبين عليا، فن تقيل، أنا مقدرش أفنن كده". 

وعن غفلة السينما عن الفنانة سهير البابلي رغم أدائها الرائع على خشبة المسرح، قالت: "الحكاية إن الوقت لم يتح لي، وكل حاجة بوقتها، وأنا بحب لما أعمل حاجة في السينما بعملها حلو أوي لأني ضيفة على السينما وعلى جمهوره".

وأردفت: "أنا بلاقي نفسي في المسرح أكتر، كنت زمان بقول ليه ممثلات المسرح مبيجوش للسينما، فيه نجمات كبار لما تجيبي لهم سيرة المسرح يقولوا لا إحنا منقدرش، فممكن أنا ماليش في السينما، وممكن مخرجين ما شافونيش فوتوجونيك وهو الوجه الذي يصلح لكاميرا السينما لأنها حساسة جدًا، ومن الممكن أن يكون أدائي عالي على السينما، وممكن حاجات كتير أنا معرفهاش".