كشفت الإعلامية سالي عبدالسلام، عن إصابتها بمرض جلدي في فروة شعرها، وذلك عبر حسابها الرسمي بموقع التواصل الاجتماعي لتبادل الصور والفيديوهات "إنستجرام".
وقالت عبدالسلام إنها في ابتلاء منذ 5 سنوات، وكتبت: "أنا فى الابتلاء ده من 2017.. آخر مرة جتلى الثعلبة فى شعرى ومشيت وقالولى مش هتيجى تانى كان من سنتين نفس الشهر ده بالظبط أبريل ٢٠٢٠".
وأضافت: "عند الناس بتيجى بالواحدة، أنا حتى فى دى ربنا بيختبرنى بزيادة.. سبحانك يا رب.. يبتليك الله ويختبرك فى أكتر حاجة بتحبها أو كانت مميزة زمان والناس فاكرة إنها زى ما هى.. والناس كلها بتمدحها وكانت حلوة زمان ويختبرك!!!".
وتابعت: "الرضا من عندك يا رب عشان بدأ يروح منى سامحنى واعفو عنى ومعنديش لا قوة ولا طاقة ولا قادرة أصبر وأبدأ من جديد العذاب ده.. كان لازم أروح الفطار مع الولاد فى الدار ملهمش ذنب، وأنا وعدتهم قبل ما أسمع الخبر وأبقى مضطرة أنبسط وأجبر بخواطر وخاطرى مكسور".
وواصلت: رجعت أكتر حاجة بتوجع فى الدنيا حقن الكورتيزون فى الراس! 7 حقن فى عضم الراس ١٠ شكات "٧٠ شكة".. والدموع بتقع منى غصب عنى والله مع إنى عمرى ما بعرف أعيط قدام حد ! الدكتورة سالى حضنتنى.. ربى يسعدك.
وطالبت متابعيها بالدعاء لها، وكتبت: "ادعوا لى يعفو عنى وماخدش كورتيزون كورسات كاملة تانى واتبهدل تانى وأبدأ من أول وجديد تانى والوجع تانى.. اللهم إنك عفو كريم تحب العفو فاعف عنا🙏…اللهم أجرني فى مصيبتى واخلف لى خيرًا منها".
انفصال قبل حفل زفافها
وكانت كشفت المذيعة سالي عبدالسلام، منذ عام، أنها قدّمت معظم حلقات برنامجها "قصة حقيقية"، والذي يذاع على شاشة التليفزيون المصري، وهي في حالة نفسية سيئة للغاية، وقبل الظهور على الهواء مباشرة كانت في حالة بكاء شديدة.
قالت: "أنا جيت معظم الحلقات وأنا معيطة، ومش مكسوفة إني أقول كده، أهلي بيستنوا مني إني أكون قوية، لكن اللي حصل المرة دي إني منيت نفسي أوي، مش هقول إن اختياراتي غلط، لأني مش بختار أصلا، أنا ممكن ألاقيني داخلة في قصة وأنا مخترتش عادي، أنه شخص مناسب، أنا بختار السكينة والمودة والرحمة، مش زي ما الناس بيقولوا إني مش عاجبني العجب، بسمعها كتير".
تابعت: "أيوه كنت باجي التصوير كتير جدا معيطة وبالذات الشهر ده، عشان كنت ممنية نفسي إني هكتب كتابي وأتجوز، بس الموضوع ممشيش ومحصلش نصيب، لأن أغلبية اللي بنعرفهم مبقوش قد المسئولية ومبقوش رجالة ومبقوش يستاهلوا، مذيع الاجتماع برضوا ملهوش حصانة إنه يحكى ويتكلم".
استكملت: "الحمد لله يا رب، يمكن أخدت مني حاجات كتير أوي بعد ما كنت منيت نفسي ومتوقعتش أنها هتتاخد مني وفي الوقت ده، الفترة دي كل ما أكلم حد أعيط ويصعب عليّا نفسي، بس إنت عوضتني يا الله".
