حكى الفنان مجدي صبحي موقفًا طريفًا مع الفنان يوسف وهبي في المسرح عندما كان عمره 8 سنوات.
وقال مجدي، خلال لقائه مع الإعلامية شيرين سليمان، في برنامج "نص الحدوتة"، المذاع عبر فضائية cbc: "كان فيه ولد صغير بيطلع يقول جملة على المسرح، جات له حمى ومجاش، المخرج قال لوالدي محمود صبحي ممكن ناخد ابنك يقول الجملة".
وأضاف: "كنت بأتفرج على سفير جهنم وكان يوسف وهبي طالع شيطان، لكن أول مرة في حياتي أشوف كواليس، أول مرة أشوف يوسف وهبي في الحقيقة، والست أمينة رزق بتقوله دول ولادك، فقال لها دول ولاد الخطيئة، وأنا دخلت قلت له بابا بابا، قال اخرس يا ابني الخطيئة، وضربني بالمسدس، مفروض امسك جنبي وأقع على الأرض، قلت له اخس عليك يا بابا، ووقعت".
وأردف مجدي صبحي: "يوسف وهبي مسرحه بكاء وليس كوميدي، فلأول مرة الناس بدل ما تعيط بتضحك، وأنا لقيت نفسي قدام سفير جهنم، فقال لي تعالى هنا، إيه حكايتك هتخرج عن النص من دلوقتي، وإداني شيكولاتة احتفظت بها 3 سنين، ولما روحت خدت علقة من أبويا، قال لي إنت بوظت الدنيا وبوظت تاريخ يوسف وهبي، مدني على رجلي 10 ضربات، لكن تعلمت مفيش حاجة اسمها تخرج عن النص".
