اعترف عصام الحضري، مدرب حراس مرمى منتخب مصر، بأن والده كان يرفض فكرة لعبه الكرة، قائلًا: والدي كان بيقولي كورة مفيش.. دراسة بس، روحت لوالدتي وسألتها أعمل إيه فقالتلي: "أنا هداري عليك".
وأضاف الحضري خلال لقائه ببرنامج العرافة، المذاع عبر فضائية المحور، الذي تقدمه الإعلامية بسمة وهبة، أنه كان يقفز من بلكونة المنزل ويتجه للعب الكرة، وبعد انتهائه من اللعب يقوم بغسل ملابسه في الترعة، ثم يدخل إلى المنزل من خلال البلكونة أيضًا: "كنت بغسل اللبس في الترعة وأطلع أعصره وأنط من الشباك كأن مفيش حاجة حصلت" حتى اكتشف والده هذا الأمر.
وأوضح الكابتن عصام الحضري أن والده عندما عرف بذلك قام بحرق ملابسه، معقبًا: "حرق اللبس قدام عيني، والدموع نزلت من عيني".
وتابع: "مرة تانية كنت بلعب في دورة رمضانية، ورجعت متأخر من دمياط لكفرالبطيخ 7 كم جري، مكنش فيه مواصلات ولا ماديات، وأمي مكنتش بتديني فلوس عشان كانت عارفة إني هلعب كورة، وأبويا كان بيعاقبني، ولما رجعت اتضربت علقة، إيده كانت طرشة وأصابع يده كانت معلمة على وشي، ومن كتر زعلي مكنتش عارف قلعت اللبس فين، وخده وحرقه مرة تانية".
وأردف: "والدي بدأ يدعمني ويقف بجانبي بعد ما ربنا كرمني، وبدأت أتعرف وألعب في الناشئين والناس تتكلم عليا".
