استضافت الإعلامية بسمة وهبة، في حلقة جديدة من برنامج "العرافة"، المُذاع على فضائية "المحور"، مساء الأحد، مدرب حراس مرمى المنتخب الوطني، الكابتن عصام الحضري.
وتعليقًا على كلام الإعلامي أحمد شوبير حول استخدام حارس الفراعنة محمد أبوجبل قارورة المياه خلال ركلات ترجيح كأس أمم إفريقيا 2021، قال عصام الحضري: “ردي الحاجات دي بأخدها دون زعل أو عصبية والعالم والعلم بيعمل كده، كل دوريات العالم بيعملوا كدا بالطريقة دي”، لتقاطعه بسمة وهبة: “أكيد كابتن شوبير متابع كل دوريات العالم"، ليرد: ”أنا تعلمت كده في عالم التدريب والدورات التي حصلت عليها ولذلك وصلت إلى المرحلة اللي أنا فيها".
لتقاطعة بسمة وهبة: "عشان كدا نزلت أغنية متغاظ يلا متغاظ ونزلت صورة على صفحتك، متقوليش مقصدش، دا مع سبق الإصرار والترصد"، ليرد الحضري: "معمولي منشن من حد".
الحضري والنادي الأهلي
وحول تصريحات الكابتن مانويل جوزيه، عن الحضري عندما غادر صفوف النادي الأهلي، والتي قال فيها إنه كاذب ويبحث عن المال، قال الحضري: "أحداث كورة القدم، وارد يحصل بينك وبينه مشاكل في التدريب، يمكن أكثر حد حصل بينه وبيني مشاكل كان مانويل، وقعدت أفكر في الكورة والبطولات وخدت 25 بطولة".
وردًا على سؤال "ضحيت بالنادي الأهلي ليه عشان تروح نادي سويسري صغير"، قال: "طلما بشتغل معاكي لازم آخد مقابل بالفلوس، في الأول والآخر كنت عايز أحترف، أنا محترفتش عشان الفلوس، كانت أمنية حياتي، وفي الأول والآخر هاخذ مقابل، روحت عشان حتة احتراف، وحتة فلوس، مش حاجة واحدة، ده الخطأ الوحيد اللي في حياتي إني سبت النادي الأهلي، أنا غلطان يا أهلي".
