استضافت الإعلامية بسمة وهبة، في حلقة جديدة من برنامج "العرافة"، المُذاع على فضائية "المحور"، مساء الأحد، مدرب حراس مرمى المنتخب الوطني، الكابتن عصام الحضري.
وكشف الحضري خلال الحلقة عن كواليس عقب مباراة السنغال في تصفيات كأس العالم، قائلًا: "عشان ندخل الأوضة في ممر كدا، كل لاعب بيخش بيأخذ اللي فيه النصيب ميه أزايز، شباشب، توقعي إحنا خرجنا من الأوضة بعد قد إيه.. ساعتين وربع مش عارفين نخرج.. الجماهير نزلت الملعب تحتفل مع اللاعبين، والتصوير الناس كلها شايفاه".
وعن الجهاز الفني، قال: "كيروش والناس واللاعيبه كلها حزينة، دخل الدكتور أشرف صبحي اتكلم مع اللاعيبة، اللي قعد يعيط واللي زعلان واللي متعصب، ومحمد صلاح اتكلم وقال يزيدني شرف حضرت جيلين، أبوتريكة شوقي زيدان حضري، سعيد إني لعبت معاكم، اتكلم في حتة إنه هو يعتزل، في وقت هزيمة ممكن يطلع منك أي حاجة بس لما تهدى بعد كده الموضوع بيتغير ده حزن أو انفعال لحظي، الحاجات دي بتيجي من حزنك عدم وصولك لكأس عالم، حاسس إن الشعب المصري كان عايز يفرح".
وتابع:" كلنا حزننا عشان الشعب المصري، كنا عايزين نفرحه بأي حاجة"، لترد بسمة وهبة: "يعني أنتو مش عندكو طموحات شخصية، تلعبوا كأس عالم، مش عايزة الشخصية المثالية دي يا كابتن"، ليرد الحضري: "هو فيه حد مش عايز يوصل كأس عالم، لما طلع الكلام من صلاح، أكيد كان حزين على عدم وصوله".
