نفى الفنان حميد الشاعري، أن يكون عمل نجله الموزع الموسيقي نديم الشاعري، مع عمرو دياب، مجاملة له، قائلًا "إن الفن لا يورث، وأغنية ابني مع عمرو دياب متتسابش ومجاملنيش فيها، وعمري ما دفعت ابني لحاجة، ولا وقفت جنبه في حاجة، ولا عمري قلت له دو ري مي حتى".
وأضاف الشاعري، خلال لقائه مع الإعلامية بسمة وهبة، في برنامج "العرافة" المذاع عبر فضائية "المحور"، اليوم الأربعاء: "ابني اتعرف من الشغل على النت، زي أي حد في الجيل ده، وشايف إن نديم فنان جميل جدا، أنا عارف دماغه وموهبته، ومش عاوز أغلط معاه غلطات كتير حصلت مع ولاد فنانين".
كشف شيخ العرافين، واقعة حدثت بين الفنان حميد الشاعري والفنان علاء عبدالخالق، موضحًا: "حميد قاله أكتر حاجة عجبتني في الألبوم بتاعك هي البوستر، وزعل منه جدا".
ورد الشاعري: "في إيفيهات أكتر من كده بكتير يا شيخ العرافين، ومزعلش مني ولسه صحاب لحد دلوقتي خالص، علاء صديق عمري وأخويا".
وأردف: "اللي حصل ده تهريج بيننا، وبيحصل أكتر من كده، والله ما زعل مني وعمره ما يزعل مني، إحنا شلة لذيذة جدا، شلة الثمانينيات دي جميلة جدا مع بعض".
