«مش قرار الست».. هانى مهنا يكشف تفاصيل خدعة طلاق سميرة سعيد

تحدث الموسيقار هاني مهنا عن علاقته بالمطربة سميرة سعيد، قبل الزواج وبعده، قائلًا «وشنا كان حلو على بعض، وكنت المؤسسة وراء سميرة، بأتدخل في اللبس وكل حاجة، تجعلها براقة، وذكاؤها خلاها تستقبل ده بصفاء نية».

وأضاف مهنا خلال حواره مع راغدة شلهوب في برنامج «سابع سما»، المذاع عبر فضائية «النهار»: «كانت تحكي لي عن مشاكلها، وأحكي لها عن مشاكلي، لما حصل انفصال مع زوجتي، سميرة طلبت نتجوز، قلت لها نستنا سنة عشان ميتقالش خدتيني من مراتي».

وعن تصريح سميرة سعيد بأن عدم التفاهم جعلها تشعر بالندم والخوف وعدم الأمان، مما دفعها للطلاق، قال مهنا إنه كان لديه ولد وبنت، واتفقا مع سميرة ألا ينجبا، وهي وافقت على ذلك، وقالت: «أنا مش محتاجة أولاد، وعايزة أفضل مشعشعة، بعد 5 سنين زواج، والدتها وأختها أقنعوها بالإنجاب، ليكون لها وارث».

هاني مهنا: تراجعت عن قرار عدم الإنجاب لأن سميرة صعبت عليا

وأردف: «حكيت لي، صعبت عليا، ورغم إن بينا اتفاقا لكن صعبت عليا، ليه أحرمها من الخلفة، وقلت نحاول لكن ربنا لم يرد، سافرنا لباريس أيام حرب العراق في 2003، ربنا مأرادش لكن شاء لما ننفصل، أنا أجيب هنادي وهي تجيب شادي».

وقال مهنا إن ما تردد عن عدم غيرته عليها، وعدم اهتمامه بها كزوجة، وإنها كانت فقط مجرد مشروع بالنسبة له، غير صحيح، وأنه اهتم بكل شيء، وكان يصارحها بما يزعجه، كما نفى ما قالته عن طلبه سحب الجنسية منها.

تفاصيل خدعة الطلاق 

وكشف مهنا عن أنهما اتفقا على الانفصال، فطلبت سميرة أن تنفصل بعد الحفلة، مردفًا: «صعب عليا، لأن الراجل اللي يقرر الطلاق مش الست، مع احترامي لكل امرأة، قبل السفر بـ10 أيام، كلمتها قلت لها تعالي لازم تمضي عقد للمتعهد، وأحضرت مأذون ببدلة وواحد صاحبي، وابن عمي، حضرت ورق الطلاق جت سميرة، قلت لها طلبتي نقعد بعد الصيف، لكن مش أنتي اللي تقرري، أنا اللي أقرر نتطلق دلوقتي».

وأردف: «وقعت جابولها ليمون، وكانت مفاجأة لم تتخيلها، إحنا الاثنين كنا بنحب بعض، لكن قرار الانفصال مش الست اللي تقرره، عيب».