رئيس مجلسي الإدارة والتحرير
محمد الباز
رئيس مجلسى الإدارة والتحرير
محمد الباز

«الإخوان بيصطادوا فى المياه العكرة».. شريف إدريس يكشف سر اعتزاله الفن

ستوديو

كشف الفنان شريف إدريس، الذي أعلن اعتزاله التمثيل، عن سر اعتزاله الفن، قائلًا في منشور عبر صفحته على موقع التواصل الاجتماعي “فيسبوك”: "معلش يا جماعة، أنا بعتذر للجميع عن عدم ردي على التليفون، وأنا الحمد لله كويس وبخير.. بس فيه كام حاجة مهمة جدًا عايز أوضحها للناس اللي بتقولي شيل البوست علشان ولادك".

شريف إدريس: عيالي أهم حاجة عندي

وأضاف إدريس، في منشوره: "أنا مش محرج ولا مكسوف من اللي كتبته، واللي كتبته وحضراتكم مش قادرين تفهموه إني راجل بيحترم نفسه ومش قابل إهانة في شغلي اللي اتربيت فيه وولادي هيكبروا ويفهموا ده.. أنا مقولتش إني فكرت أقتل عيالي أنا قولت إن الضغوط اللي أنا فيها وصلتني إني بحلم بكوابيس إني بقتل عيالي، وأظن كلكم بتحلموا بكوابيس، عيالي دول هم كل حاجة في حياتي لا يمكن أؤذيهم ولا أفكر أؤذيهم".

وتابع: "أنا مقولتش اعتزلت علشان أتوب.. أتوب عن إيه مش فاهم، أنا شاركت من وأنا عيل صغير في أعمال محترمة الكل بيحبها، وعمري ما شاركت في حاجة خليعة.. والناس اللي واخدة البوست باستهزاء وتقليل وعدم احترام، دول ما يتردش عليهم، اللي يستهزأ في كرب بني آدم، يبقى شخص عديم الإنسانية".

شريف إدريس: الإخوان بيصطادوا في المية العكرة

واستكمل: "أيوه أنا بدور على فرص سفر كويسة مش علشان بكره البلد، أنا بعشق تراب البلد دي أكتر من أي حد.. ناس كتير بعتتلي إن قناة الجزيرة مشيرة البوست بتاعي، وصفحات الإخوان، ودي مش مسئوليتي وكل الناس عارفين موقفي الواضح تمامًا ضد الإخوان، وكل الناس عارفين أنهم بيصطادوا في المية العكرة، والأهم إن أنا كل كلامي واضح وصريح ومالوش أي علاقة بالسياسة ولا اتهمت الدولة ولا قولت مؤامرة ولا قولت أي حاجة أصلًا.. دي أرزاق والأرزاق على الله وأنا راضي بقضاء الله وقدره، الحمد لله".

شريف إدريس: أنا مش هستنى يجرالي حاجة وأبقى راقد

وأردف: "الحمد لله إني أخدت قراري وأنا واقف على رجلي وبصحتي لأن فيه زملاء وصلوا لمراحل صحية صعبة، ربنا معاهم ويشفيهم، فأنا مش هستنى يجرالي حاجة وأبقى راقد.. دعواتكم، أنا الحمد لله كويس وبخير، وإن شاء الله كله هيعدي، من كان رزقه على الله فلا يحزن.. تحياتي للجميع وشكرًا ليكم ولمحبتكم".

شريف إدريس يعلن اعتزاله الفن

وكان الفنان شريف إدريس، أعلن  أمس اعتزاله الفن، عبر حسابه على "فيسبوك"، قائلًا: "بسم الله الرحمن الرحيم، بعد ٣٥ سنة سعي وتعب في الوسط الفني، قررت الاعتزال والابتعاد تماما وتغيير مسار حياتي، وأي حد عنده فرصة سفر ليا هكون شاكر ليه وده طلبي الوحيد، وده قرار أخدته بعد ما الأمور وصلت في الوسط الفني لمرحلة عبثية".