تصدر الفنان الشاب شريف إدريس، التريند عبر مواقع التواصل الاجتماعي، بعد إعلانه اعتزال الفن نهائيًا، موضحًا العديد من المشكلات، وبعض التفاصيل الخاصة بحياته الشخصية التي تأثرت بالأوضاع التي مر بها، بالإضافة إلى مواجهته مشاكل وصعوبات مادية، وذلك عبر حسابه على موقع التواصل الاجتماعي "فيسبوك".
منشور شريف إدريس
وكتب شريف إدريس، قد عبر حسابه على موقع "فيس بوك": بسم الله الرحمن الرحيم بعد ٣٥ سنه سعي وتعب وشقي في الوسط الفني قررت الاعتزال والابتعاد تمامًا وتغيير مسار حياتي وأي حد عنده فرصة سفر ليا هاكون شاكر ليه وده طلبي الوحيد.. وده قرار أخدته بعد ما الأمور وصلت في الوسط الفني لمرحله عبثية وصلت إني بقيت بشوف بعض الزملاء بيشحتوا الشغل علني علشان يشتغلوا لأن الشغل بقي متقسم علي ناس معينة.. فلو الأمور وصلت لكده أبعد أحسن.. وحتي لما بيجي شغل بيتفرض عليك توافق بأقل الفلوس وتخرج من الشغل مديون.. ومواقف مهينة زي إن شركة إنتاج تعرض عليك أجرًا هو قيمة ربع أجرك والسبب إن الميزانية مصروفة عالديكور.. طب خلو الديكور يمثل.
وأضاف: هحكيلكم موقف حصل معايا من أسبوع.. اتصل بيا حد قالي عايزين حضرتك بكره عندك تصوير في مسلسل كذا بس هتدفع عشرة في الميه للكاستينج دايريكتور.. كان هيجيلي جلطة بعد ما قفلت المكالمة ووافقت علشان أنا محتاج أشتغل ومحتاج فلوس.. وماقدرتش استوعب الفكرة بصراحة إني بعد العمر ده مضطر أدفع علشان أشتغل فاتصلت واعتذرت…وده الحال حاليًا أن الأمور بقت في إيد كاستينج دايريكتور.. وده موقف من مواقف كتير مريت بيها لو حكيتها محتاجة كتاب مش بوست عالفيس، فطالما الشغل بقي لازم يتدفعله وطالما الشغل بقي بالشحاته يبقي بلاش أحسن.
وتابع: أنا طول عمري راضي الحمد لله بس حقيقي أنا وصلت لمرحلة اكتئاب وصلتني إني بقيت بنام أحلم بكابوس إني بقتل عيالي وبقتل نفسي لأني وصلت لمرحلة نفسية ومادية إني بقيت مش قادر أربيهم ولا أصرف عليهم وأنا عندي تلات أطفال بعبدهم عبادة متخيلين حجم المسئولية.. وبقيت مديون لطوب الأرض.
وأردف: «حقيقي لو حد عنده فرصة سفر ليا هاكون شاكر ليه جدًا وهيكون جميل في رقبتي لحد ما أموت لأن حقيقي أنا مش قادر أعيش في البلد دي تاني أنا حاولت أسعي في أي مجال تاني بس ماقدرتش، وحقيقي لو اتعرضت عليا بطولات بعد البوست ده هرفضها لأن البوست ده هو نهاية علاقتي بالمجال اللي اتربيت فيه ودرسته وعشت فيه كل تفاصيل حياتي والحمد لله علي كل شى».
وواصل: «همسح أبلكيشن فيسبوك من تليفوني لأني هنزل أبيع تليفوني أصلًا..فأنا هكون متاح أونلاين لحد بالليل.. لو حد عنده فرصة شغل وسفر ليا ومش معاه رقمي ياريت يجيبه من أي حد، ملحوظة: أنا مش محتاج طبطبة من حد أنا محتاج فرصة سفر وشغل تخليني أعيش ولادي حياة كريمة وبس.. شكرًا ليكم محبتي للجميع هاين عليا أقوم أرمي نفسي من البلكونة بعد ما وصلت إني أكتب البوست ده».
آخر أعمال شريف إدريس
شارك الفنان الشاب شريف إدريس، في المارثون الرمضاني الماضي 2021 بمسلسل "قصر النيل"، الذي جمعه بعدد من النجوم أبرزهم: دينا الشربيني، محمد حاتم، أحمد خالد صالح، ريهام عبدالغفور، ونبيل عيسى، وعمر السعيد، وناردين فرج، ومريم الخشت، ومحمود البزاوي، وإخراج خالد مرعي.
