علق الملحن بلال سرور، على الجدل المثار حول أغنية "بشوقك" التى قدمها تامر حسنى وكشف حمادة هلال عن مفاجأة بشأنها عبر برنامج "حبر سرى" مع الإعلامية أسما إبراهيم، وذلك عبر حسابه على موقع التواصل الاجتماعي فيسبوك.
وقال بلال سرور: “بمناسبة وصول أغنية عيش بشوقك 130 مليونا، وعشان جالي كذا تعليق، متضايقين من طريقة تعليقي على اللي قالوا الفنان حمادة هلال، فأنا بعتذر أولًا وثانيًا اسمحولي أرد، صديقي الفنان مصطفى حسن، كلم حمادة هلال، وطلب منه يجيلنا يجرب صوته على غنوة مهمة، حمادة جالنا وجرب الأغنية وعجبته، وكان يوم جميل وكله تمام”.
وأضاف سرور: “لفترة كبيرة أنا مش متذكر، هي قد إيه كنا بنحاول نكلم حمادة وابعتله رسايل، ومفيش أي نوع رد منه لا بالسلب ولا بالإيجاب، بيروح أفراحه وشغله عادي وحفلاته ويسافر ويرجع وبرده مبيردش، بيقابل فنانين وبيسمع أغاني تانية عندهم وبرضو مبيرجعلناش يقولنا ناوي يعمل إيه، بعد ما صلينا استخارة، وسمعنا الأغنية لصديقنا المنتج هاني محروس، اللي كان بيحضر إنه ينتج أغنية للفنان تامر حسني في التوقيت ده واتفقنا إن الأغنية يغنيها تامر حسني، وبرده حمادة مش ظاهر فالصورة”.
واستطرد: “الغنوة سجلناها وبدأ تامر تصويرها، هنا ظهر الفنان حمادة، وبدأ يكلم مصطفى حسن، يلا أنا جبت منتج للأغنية تعالوا ننفذها وهو هيحاسبكم، الفكرة بالنسبة للفنان حمادة إنه مكنش عايز يشتري الأغنية هو كان راكنها وبيدور على حد يشتريها، إحنا طبعًا اتصدمنا وفهمناه إن الأغنية اتباعت، طبعًا هو كان متضايق جدًا، بس ده فشغلنا شيء طول الوقت وارد، لأن إنت ملتزمتش معانا بحاجة، ولا حتى بتقدير إنك تتواصل معانا”.
وتابع: “حمادة اتضايق جدًا، وبقى بيطلب مننا بأي شكل نرجع الغنوة وإن المنتج هيديكوا اللي أنتم عايزينه، إحنا طبعًا كنا التزمنا مع هاني محروس والفنان تامر حسني، وأنا بقسم بالله ومش محتاج أحلف إني من كتر ما صعب عليا حمادة، فكرت أنا ومصطفى نستأذن تامر ونرجعله الأغنية”.
بشوقك دي غنوتي
وكان الفنان حمادة هلال ظهر فى برنامج "حبر سرى" مع الإعلامية أسما إبراهيم قائلا: "أغنية بشوقك دي غنوتي قعدت أشتغل عليها 6 شهور وتعبت فيها والملحن والمؤلف عارفين كويس وانشغلت في مرض أمي حوالي أسبوعين".
وأضاف هلال، أنه بدأ يتكلم بعد الأسبوعين لتنفيذ الأغنية وفوجئ بأن الأغنية ذهبت في اتجاه تاني، متابعا: "كلمت فريق العمل وقلت لهم دي غنوتي وحقي ده حرام وفجأة راحت فى حتة تانية".
واستكمل: "أنا كنت فرحان بالأغنية دي، وكنت اقدر أزعل اللي حولوا مسار الأغنية وكنت ممكن أنزل تاني يوم بها على السوشيال ميديا، ولكن استعوضت وربنا عوضني بعدها علطول بأغنية اشرب شاي وكسرت الدنيا وبقت غنوة وإعلان".
