قال الدكتور محمد الباز، رئيس مجلسي إدارة وتحرير جريدة "الدستور"، إن اليوتيوبر التركي كوكسال بابا وصل القاهرة وهناك حالة حفاوة كبيرة به، والدنيا اتقلبت، وتم استقباله في المطار، ونزل في فندق في التجمع، وذهب إلى محل مشويات شهير، وبسبب مقطع فيديو تم تصويره البعض يرى أن هناك جريمة ارتكبت بسبب محتوى الفيديو.
وأضاف، خلال برنامجه "آخر النهار" المُذاع على قناة "النهار": "كوكسال يعاني من مرض وراثي أدى أنه يكون قصير القامة، ودخل عالم السوشيال 2015، واشتهر بسبب مقطع فيديو ظهر فيه وهو في خناقة مع شخص ضخم، وكوكسال بابا يتابعه 3 ملايين و200 على تيك توك، ومليون على قناته باليوتيوب".
وواصل: "في المقطع الفيديو المتداول لكوكسال، أول جريمة ارتكبها الناس بتوع محل المشويات الاتجار بالبشر لأنهم استغلوا الرجل بصفاته الشكلية في الترويج، وثاني جريمة التحريض على الفسق والفجور، لأن في الفيديو في أختين بنات، وشخص بيقول نسيبهوملك ساعتين ونرجع تاني، والبنت اللى بتأكله الراجل يقول كوكسال بيحب اللحم الأبيض، بالإضافة لجريمة إهانة للعلم المصري".
وأردف: "في ناس رغبة في المكسب والترويج بتحصل المهازل دي في الوقت اللى إحنا مشغولين فيه على 6 آلاف مصري في أوكرانيا والحرب اللى بيموت فيها الناس، للأسف ناس عايشة في عالم موازي، ومفيش أي قيم ولا أخلاق، والمهم في مكسب".
